விஜய் நடிப்பில் உருவான ‘ஜன நாயகன்’ திரைப்படம் இணையத்தில் கசிந்த விவகாரம் பெரும் பரபரப்பை ஏற்படுத்தியுள்ள நிலையில், இதற்கும் தமக்கும் எந்தவிதத் தொடர்பும் இல்லை என்று மத்திய திரைப்படத் தணிக்கை வாரியம் அதிகாரப்பூர்வ விளக்கம் அளித்துள்ளது. தணிக்கைக்காகச் சமர்ப்பிக்கப்படும் படங்கள் அனைத்தும் மிகவும் பாதுகாப்பான தொழில்நுட்ப முறையில் கையாளப்படுவதாகவும், இதற்கான ரகசியக் குறியீடு தயாரிப்பாளரின் முழுமையான கட்டுப்பாட்டில் மட்டுமே இருக்கும் என்றும் தெரிவித்துள்ளது.
மேலும், கடந்த மார்ச் 17-ஆம் தேதியே படத்தின் டிஜிட்டல் தொகுப்பு விண்ணப்பதாரரிடம் முறையாக ஒப்படைக்கப்பட்டுவிட்டதால், வாரியத்தின் மீது சுமத்தப்படும் குற்றச்சாட்டுகள் ஆதாரமற்றவை என்று தெளிவுபடுத்தப்பட்டுள்ளது. இந்தத் திரைப்படக் கசிவு குறித்து அரசியல் ரீதியான பல்வேறு யூகங்கள் பரவி வந்த நிலையில், தணிக்கை வாரியத்தின் இந்த அறிக்கை வதந்திகளுக்கு முற்றுப்புள்ளி வைத்துள்ளது.
இதனால் தணிக்கை வாரியம் படத்தை ஒரு பெரிய திரையில் மட்டுமே பார்க்கும் என்றும், உயர்தர வடிவில் படம் கசிந்துள்ளதால் இது தயாரிப்புத் தரப்பு அல்லது பிற விநியோகச் சங்கிலி மூலமாகவே நடந்திருக்க வாய்ப்புள்ளதாகவும் திரைத்துறை வட்டாரங்கள் கருதுகின்றன. திரையுலகைச் சேர்ந்த பலரும் இச்சம்பவத்திற்குத் தங்கள் கண்டனங்களைப் பதிவு செய்து வருவதுடன், தளபதி விஜய்யின் ரசிகர்கள் இச்சதிக்குப் பின்னால் இருப்பவர்கள் மீது கடும் நடவடிக்கை எடுக்க வேண்டும் என வலியுறுத்தி வருகின்றனர்.