சத்தீஸ்கர் மாநிலம் துர்க் மாவட்டத்தில் உள்ள சிறப்பு போக்சோ நீதிமன்றம், 6 வயது சிறுமியை பாலியல் வன்கொடுமை செய்து படுகொலை செய்த வழக்கில் 24 வயதான சோமேஷ் யாதவ் என்பவருக்கு மரண தண்டனை விதித்து தீர்ப்பளித்துள்ளது. ஏப்ரல் 2025-ல் நடந்த இந்த கொடூர சம்பவத்தில், தனது சொந்த மருமகளையே அவர் பாலியல் ரீதியாக துன்புறுத்தி கொலை செய்தது நீதிமன்ற விசாரணையில் ஆதாரப்பூர்வமாக நிரூபிக்கப்பட்டது.
இவ்வழக்கை தீவிரமாக விசாரித்த நீதிமன்றம், குற்றவாளி சோமேஷ் யாதவை போக்சோ சட்டத்தின் பிரிவு 6(1) மற்றும் பாரதிய நியாய சம்ஹிதாவின் பிரிவுகள் 103(1) மற்றும் 238(a) ஆகியவற்றின் கீழ் குற்றவாளி எனத் தீர்ப்பளித்தது. சிறுமியின் மீதான கொடூரத் தாக்குதல் மற்றும் தடயங்களை அழிக்க முயன்றது போன்ற கடுமையான குற்றங்கள் BNS சட்டப்பிரிவுகளின் கீழ் உறுதி செய்யப்பட்டன.
தண்டனையின் விவரப்படி, குற்றவாளிக்கு மரண தண்டனையோடு சேர்த்து போக்சோ சட்டம் மற்றும் BNS பிரிவு 103(1)-ன் கீழ் ரூ 5,000 அபராதம் விதிக்கப்பட்டுள்ளது. மேலும், சாட்சியங்களை மறைத்து தடயங்களை அழிக்க முயன்ற குற்றத்திற்காக BNS பிரிவு 238(a)-ன் கீழ் ஐந்து ஆண்டுகள் கடுங்காவல் தண்டனையும், கூடுதலாக ரூ 1,000 அபராதமும் விதித்து நீதிபதி உத்தரவிட்டுள்ளார்.