மும்பையின் மிகவும் புகழ்பெற்ற ‘லால்பாக்ஸா ராஜா’ விநாயகர் சிலையின் 2026-ஆம் ஆண்டிற்கான முதல் தோற்றம் வெள்ளிக்கிழமை மாலை 7 மணிக்கு முறைப்படி வெளியிடப்பட்டது. இந்த ஆண்டு விநாயகர் சதுர்த்தி விழா செப்டம்பர் 14 முதல் தொடங்கவுள்ள நிலையில், பாப்பாவின் பிரம்மாண்டமான தோற்றத்தைக் காண திரளான பக்தர்கள் அங்கு திரண்டனர். திரைக்குப் பின்னால் இருந்து பகவான் கணேசனின் கம்பீரமான சிலை வெளிப்பட்டபோது, “கவுன் ஹைன் வோ” எனும் திரைப் பின்னணி இசையுடன் வெளியீட்டு விழா மிக பிரம்மாண்டமாக நடைபெற்றது.
இந்த ஆண்டின் அலங்காரக் கருப்பொருள் மற்றும் வடிவமைப்பு பக்தர்களை வெகுவாகக் கவர்ந்துள்ளது. மிகப்பெரிய கோவில் போன்ற நுழைவாயில் வடிவமைப்பு, கலைநயமிக்க கட்டிடக்கலை வேலைப்பாடுகள் மற்றும் பிரம்மாண்டமான திரிசூலம் ஆகியவை இந்த பந்தலின் முதன்மை சிறப்பம்சங்களாக அமைந்துள்ளன. 1934-ஆம் ஆண்டு தொடங்கப்பட்ட இந்த லால்பாக்ஸா ராஜா விநாயகர் உற்சவம், தற்போது 93-வது ஆண்டை எட்டியுள்ளது குறிப்பிடத்தக்கது.
லால்பாக்ஸா ராஜாவின் முதல் தோற்றம் தொடர்பான புகைப்படங்களும் வீடியோக்களும் சமூக வலைதளங்களில் வெளியாகி வைரலாகி வருகின்றன. பம்பாயின் பாரம்பரியத்தையும் பக்தர்களின் நம்பிக்கையையும் பறைசாற்றும் வகையில் அமைந்துள்ள இந்த மனோகரமான விநாயகர் சிலையை நேரில் தரிசிக்கவும் ஆசி பெறவும் வரும் நாட்களில் லட்சக்கணக்கான பக்தர்கள் மும்பைக்கு வருகை தருவார்கள் என எதிர்பார்க்கப்படுகிறது.