தமிழக அரசியல் களத்தில் புதிய திருப்பமாக, நடிகர் விஜய்யின் தமிழக வெற்றிக் கழகம் தனது முதல் தேர்தலை எதிர்கொள்ளும் வகையில் வியூகங்களை வகுத்து வருகிறது. குறிப்பாக, கூட்டணியில் பாமகவை இணைக்க தவெக தலைமை தீவிரம் காட்டுவதாக வெளியாகும் தகவல்கள் அரசியல் வட்டாரத்தில் பெரும் பரபரப்பை ஏற்படுத்தியுள்ளன. விடுதலை சிறுத்தைகள் கட்சி கூட்டணியில் இல்லாவிட்டாலும் தங்களது சமூக வலைப்பின்னல் மூலம் பட்டியலின வாக்குகளைப் பெற முடியும் என்றும், ஆனால் வட மாவட்டங்களில் பலமான வன்னியர் வாக்குகளை முழுமையாகக் கவர பாமகவின் பலம் அவசியம் என்றும் தவெக கருதுவதாகக் கூறப்படுகிறது. இதனால் விசிகவை கூட்டணியில் வைத்துக் கொள்ள விரும்பினாலும், அவர்கள் வெளியேறினாலும் கவலைப்படத் தேவையில்லை என்ற மனநிலையில் தவெக இருப்பதாகத் தெரிகிறது.
இந்த அரசியல் நகர்வு விசிக தலைவர் திருமாவளவன் தரப்புக்குக் கடுமையான நெருக்கடியை ஏற்படுத்தியுள்ளது. தவெகவின் இந்த நிலைப்பாடு, விசிகவின் பேரம் பேசும் சக்தியைக் குறைப்பதோடு, திமுக கூட்டணியிலும் தர்மசங்கடமான சூழலை உருவாக்கும் என அரசியல் பார்வையாளர்கள் கருதுகின்றனர். விசிகவைப் பொறுத்தவரை, தவெக போன்ற புதிய கட்சியுடன் கூட்டணி அமைக்கும் பட்சத்தில் தங்கள் கட்சியின் சுயமரியாதையையும், செல்வாக்கையும் விட்டுக் கொடுக்க விரும்பவில்லை. அதேசமயம், வன்னியர் வாக்குகளைக் குறிவைத்து பாமகவை இணைக்கும் தவெகவின் இந்த வியூகம் வரவிருக்கும் சட்டமன்றத் தேர்தலில் வட மாவட்ட அரசியல் சமன்பாடுகளை முற்றிலுமாக மாற்றிமைக்கும் என்று எதிர்பார்க்கப்படுகிறது.