தாய்லாந்தின் இயற்கை எழில் கொஞ்சும் பகுதியில் உள்ள ஒரு பிரபலமான விடுதியில் ஐயன் மற்றும் அவரது மனைவி தங்கியிருந்தனர். நள்ளிரவில் ஆழ்ந்த உறக்கத்தில் இருந்தபோது, ஐயன் தனது கழுத்தில் ஏதோ ஒன்று குளிர்ச்சியாகவும், மென்மையாகவும் ஊர்ந்து செல்வதை உணர்ந்துள்ளார். ஆரம்பத்தில் அது கனவு என்று நினைத்தவர், மெல்லக் கண்களைத் திறந்து பார்த்தபோது அதிர்ச்சியில் உறைந்து போனார். சுமார் 5 அடி நீளம் கொண்ட ஒரு கரிய நிற நாகப்பாம்பு (Black Cobra) அவர் மீது ஊர்ந்து சென்று கொண்டிருந்தது.
அந்த இக்கட்டான சூழலில், பதற்றத்தில் ஏதேனும் தவறான அசைவுகளைச் செய்தால் பாம்பு கடித்துவிடும் என்பதை உணர்ந்த ஐயன், சில நொடிகள் சிலையாக உறைந்து போயுள்ளார். அந்தப் பாம்பு மெல்ல மெல்ல நகர்ந்து படுக்கைக்குக் கீழே சென்ற அந்தச் சிறு இடைவெளியைப் பயன்படுத்தி, உடனடியாகத் தனது மனைவியை எழுப்பி அறையை விட்டு வெளியேறினார். “அது என் கழுத்தில் ஊர்ந்து சென்ற அந்த நொடி, என் வாழ்நாள் முடிந்துவிட்டது என்றுதான் நினைத்தேன்” என ஐயன் அந்தப் பயங்கரமான அனுபவத்தை சமூக வலைதளங்களில் பகிர்ந்துள்ளார்.
தகவல் அறிந்து விரைந்து வந்த ஹோட்டல் ஊழியர்கள் மற்றும் பாம்பு பிடி வீரர்கள், நீண்ட போராட்டத்திற்குப் பிறகு அந்த நச்சுமிக்க கருநாகத்தைப் பிடித்தனர். தாய்லாந்தின் தட்பவெப்பநிலை காரணமாகப் பாம்புகள் குளிர்ச்சியான இடங்களைத் தேடி கட்டிடங்களுக்குள் நுழைவது வழக்கம் என்றாலும், ஒரு நட்சத்திர விடுதியின் படுக்கையறைக்கே பாம்பு வந்தது அங்கிருந்த பாதுகாப்பு ஏற்பாடுகள் குறித்துப் பல கேள்விகளை எழுப்பியுள்ளது. அதிர்ஷ்டவசமாக இந்தத் தம்பதியினர் எந்தக் காயமுமின்றி உயிர் தப்பினர்.
இந்தச் சம்பவம் குறித்த புகைப்படங்கள் வெளியானதிலிருந்து, சுற்றுலாப் பயணிகள் மத்தியில் பெரும் பரபரப்பு நிலவி வருகிறது. அடர்ந்த காடுகள் அல்லது இயற்கை எழில் சூழ்ந்த பகுதிகளில் உள்ள விடுதிகளில் தங்கும் போது ஜன்னல்கள் மற்றும் கதவுகளைச் சரியாக மூடி வைப்பதன் அவசியத்தை வனத்துறையினர் தற்போது வலியுறுத்தி வருகின்றனர். படுக்கையறையில் காத்திருந்த இந்த மரணப் பிடியில் இருந்து தப்பிய தம்பதியினரின் கதை, வெளியூர் பயணம் செல்லும் பலருக்கும் ஒரு எச்சரிக்கையாக அமைந்துள்ளது.