பள்ளி வளாகத்தில் பயங்கரம்… அரசு பள்ளியில் வைத்தே ஆசிரியர் வெட்டிக்கொலை… சேலத்தை உலுக்கும் கொலைச் சம்பவம்…!

சேலம் மாவட்டம் ஓமலூர் அருகே கமலாபுரம் பகுதியில் உள்ள அரசு உயர்நிலைப் பள்ளியில், சக ஆசிரியர்கள் மற்றும் மாணவர்கள் முன்னிலையிலேயே ஆசிரியை ஒருவர் அவரது கணவரால் வெட்டிப் படுகொலை செய்யப்பட்ட சம்பவம் பெரும் அதிர்ச்சியை ஏற்படுத்தியுள்ளது. இப்பள்ளியில் ஆசிரியையாகப் பணியாற்றி வந்த ஸ்ரீவித்யா என்பவருக்கும், அவரது கணவர் விஜயமுருகனுக்கும் இடையே குடும்பப் பிணக்கு காரணமாக நீண்ட நாட்களாகப் பிரச்சினை இருந்து வந்துள்ளது. இதனால் இருவரும் பிரிந்து வாழ்ந்து வந்த நிலையில், இன்று காலை பள்ளிக்கு வந்த விஜயமுருகன், ஸ்ரீவித்யாவிடம் கடும் வாக்குவாதத்தில் ஈடுபட்டுள்ளார். இந்த வாக்குவாதம் முற்றிய நிலையில், தான் மறைத்து வைத்திருந்த அரிவாளால் ஸ்ரீவித்யாவை அவர் சரமாரியாக வெட்டியுள்ளார்.

படுகாயமடைந்து ரத்த வெள்ளத்தில் சரிந்த ஸ்ரீவித்யாவை அங்கிருந்த சக ஊழியர்கள் மீட்டு சிகிச்சைக்காக மருத்துவமனைக்குக் கொண்டு சென்றனர். ஆனால், அவர் ஏற்கனவே உயிரிழந்துவிட்டதாக மருத்துவர்கள் தெரிவித்துள்ளனர். இத்தாக்குதலை நடத்திய விஜயமுருகன் அங்கிருந்து தப்பி ஓடிவிட்ட நிலையில், ஓமலூர் போலீசார் இது குறித்து வழக்குப் பதிவு செய்து தலைமறைவாக உள்ள அவரைத் தீவிரமாகத் தேடி வருகின்றனர். கல்வி பயிற்றுவிக்கும் புனிதமான பள்ளி வளாகத்திலேயே ஆசிரியை ஒருவர் படுகொலை செய்யப்பட்ட இச்சம்பவம் அப்பகுதியில் பெரும் பரபரப்பையும், சக ஆசிரியர்கள் மற்றும் மாணவர்களிடையே ஆழ்ந்த சோகத்தையும் ஏற்படுத்தியுள்ளது.