2026 தமிழகச் சட்டமன்றத் தேர்தலை முன்னிட்டு, நடிகர் விஜய் தலைமையிலான தமிழக வெற்றிக் கழகம் வேட்பாளர் தேர்வுப் பணிகளில் தீவிரமாக ஈடுபட்டு வரும் நிலையில், விருப்ப மனுக்கள் தொடர்பாக எழுந்துள்ள குளறுபடிகள் கட்சியினரிடையே பெரும் அதிர்ச்சியை ஏற்படுத்தியுள்ளன. விருப்ப மனு விநியோகம் தொடங்கிய முதல் நாளிலேயே பல்லாயிரக்கணக்கான மனுக்கள் விற்றுத் தீர்ந்ததாக அறிவிக்கப்பட்ட போதிலும், அவற்றில் எத்தனை மனுக்கள் முறையாகப் பூர்த்தி செய்யப்பட்டு தலைமை அலுவலகத்திற்குத் திரும்பப் பெறப்பட்டன என்பது குறித்த அதிகாரப்பூர்வத் தகவல்கள் இதுவரை வெளியிடப்படவில்லை.
இந்த விவகாரத்தில் கட்சியின் மாவட்டச் செயலாளர்கள் மீது தொண்டர்கள் அடுக்கடுக்கான புகார்களை முன்வைத்து வருகின்றனர். தாங்களே வேட்பாளர்களாகக் களமிறங்கும் நோக்கில், மற்ற நிர்வாகிகள் மற்றும் தொண்டர்கள் விருப்ப மனுக்களைத் தாக்கல் செய்யக் கூடாது என்று மாவட்டச் செயலாளர்கள் மிரட்டல் விடுத்ததாகக் கூறப்படுகிறது. குறிப்பாக, மீறி மனுத் தாக்கல் செய்தால் கட்சியிலிருந்து நீக்கப்படுவீர்கள் என்று எச்சரிக்கப்பட்டதால், கட்சியின் தலைவர் விஜய் பெயரில் மனு அளிக்கத் திட்டமிட்டிருந்த பல நிர்வாகிகள் தற்போது தயக்கத்துடன் பின்வாங்கியுள்ளனர்.
மற்றொரு முக்கியக் காரணியாக, விருப்ப மனுவைப் பெற்று அதைத் திரும்பச் சமர்ப்பிக்கும் போது செலுத்த வேண்டிய 10,000 ரூபாய் கட்டணம் சுட்டிக்காட்டப்படுகிறது. இந்தத் தொகையைப் பற்றி முன்கூட்டியே தெளிவான தகவல் இல்லாததால், பல தொண்டர்கள் மனுக்களைப் பெற்ற பின்பும் அவற்றைத் திரும்ப அளிக்கவில்லை எனத் தெரிகிறது. ஒரு தொகுதிக்கு 20 மனுக்கள் கூடத் திரும்ப வராத சூழல் நிலவுவதால், இது கட்சியின் இமேஜைப் பாதிக்கும் என்று கருதி தலைமைத் தரப்பு மௌனம் காப்பதாக அரசியல் விமர்சகர்கள் கருதுகின்றனர்.
தேர்தல் செலவுகளைக் கட்சித் தலைமையே ஏற்கும் என்ற தகவல் பரவியதே இந்த உள்கட்சிப் பூசலுக்குக் காரணமாகப் பார்க்கப்படுகிறது. மாவட்டச் செயலாளர்களின் இத்தகைய ஆதிக்கப் போக்கினால் உண்மையான விசுவாசிகளுக்கு வாய்ப்பு மறுக்கப்படுவதாகக் குமுறல்கள் எழுந்துள்ளன. முதல் தேர்தலிலேயே வேட்பாளர் தேர்வில் ஏற்பட்டுள்ள இந்தச் சிக்கல் மற்றும் உள்கட்சி முரண்பாடுகளைத் தலைவர் விஜய் எவ்வாறு கையாளப் போகிறார் என்பதே தற்போது அரசியல் வட்டாரத்தின் உற்றுநோக்கலாக உள்ளது.