ரேஷன் கார்டுக்கு அப்ளை பண்ணிருக்கீங்களா?… தமிழக அரசு சொன்ன சூப்பர் குட் நியூஸ்… ரெடியா இருங்க மக்களே….!

தமிழகத்தில் புதிய ரேஷன் கார்டுகளுக்காக விண்ணப்பித்து, நீண்ட நாட்களாகக் காத்திருக்கும் பொதுமக்களுக்கு மிக இனிப்பான செய்தி வெளியாகியுள்ளது. மாநிலம் முழுவதும் நிலுவையில் உள்ள சுமார் 4 லட்சம் புதிய ரேஷன் அட்டைகளை தகுதியான பயனாளிகளுக்கு விரைந்து வழங்குமாறு தமிழக அரசு அதிரடி உத்தரவு பிறப்பித்துள்ளது. அடுத்த ஓரிரு மாதங்களுக்குள் இந்த விநியோகப் பணிகளை முழுமையாக முடித்து, பொதுமக்களின் கைகளில் ரேஷன் கார்டுகள் கிடைக்கச் செய்ய வேண்டும் என்று அதிகாரிகளுக்கு அறிவுறுத்தப்பட்டுள்ளது.

அரசு வழங்கும் பொங்கல் பரிசு, பேரிடர் கால நிவாரண உதவிகள் ஆகியவற்றைப் பெறுவதற்கும், ரேஷன் கடைகளில் வழங்கப்படும் மானிய விலை அரிசி, பருப்பு, சர்க்கரை மற்றும் எண்ணெய் போன்ற அத்தியாவசியப் பொருட்களை வாங்குவதற்கும் ரேஷன் கார்டு மிக முக்கியமான ஆவணமாகும். ஏழை, எளிய மற்றும் நடுத்தர மக்களின் வாழ்வாதாரத்தோடு நெருங்கிய தொடர்புடைய இந்த ரேஷன் அட்டைகளை உணவுப்பொருள் வழங்கல் மற்றும் நுகர்வோர் பாதுகாப்புத் துறை வழங்கி வருகிறது.

அண்மையில் பொறுப்பேற்றுக்கொண்ட உணவுத் துறை அமைச்சர் வெங்கடரமணன், சென்னை எழிலகத்தில் உள்ள உணவு வழங்கல் துறை ஆணையர் அலுவலகத்தில் நேற்று நேரில் சென்று ஆய்வு நடத்தினார். இந்த ஆய்வுக் கூட்டத்தின் போது, புதிய ரேஷன் கார்டு கோரி வந்துள்ள விண்ணப்பங்கள் மீது எவ்வித தொய்வும் இன்றி மிக விரைவாக நடவடிக்கை எடுக்க வேண்டும் என்றும், தகுதியான பயனாளிகளை கண்டறிந்து அவர்களுக்கு உடனடியாக கார்டுகளை வழங்க வேண்டும் என்றும் அதிகாரிகளுக்கு அவர் கடுமையான உத்தரவுகளைப் பிறப்பித்தார்.

மேலும், ரேஷன் கடைகள் அனைத்தும் குறிப்பிட்ட நேரத்தில் திறக்கப்படுவதையும், பொதுமக்களுக்குத் தரமான பொருட்கள் தங்கு தடையின்றி விநியோகம் செய்யப்படுவதையும் அதிகாரிகள் தீவிரமாகக் கண்காணித்து உறுதி செய்ய வேண்டும் என அமைச்சர் அறிவுறுத்தினார். அரசின் இந்த அதிரடி நடவடிக்கையால், புதிய ரேஷன் கார்டுகளுக்காக மாதக்கணக்கில் காத்திருந்த லட்சக்கணக்கான பொதுமக்கள் மற்றும் குடும்பத் தலைவிகள் மிகுந்த மகிழ்ச்சியும் நிம்மதியும் அடைந்துள்ளனர்.