“இலவச விமான டிக்கெட் முதல் சொகுசு பங்களா வரை”… தமிழக அமைச்சர்களுக்கு சம்பளம் எவ்வளவு? என்னென்ன சலுகைகள்?… இதோ முழு விவரம்….!

தமிழக அமைச்சரவை அண்மையில் விரிவாக்கம் செய்யப்பட்டுள்ள சூழலில், பதவியேற்றுள்ள அமைச்சர்கள், எம்.எல்.ஏ-க்கள் மற்றும் முதலமைச்சர் ஆகியோருக்கு வழங்கப்படும் ஊதியம் மற்றும் சலுகைகள் குறித்த விபரங்கள் பெரும் வரவேற்பைப் பெற்றுள்ளன. பொதுவாக, நாடாளுமன்ற உறுப்பினர்களுக்கான (MP) சம்பளம் நாடு முழுவதும் ஒரே சீராக இருந்தாலும், சட்டமன்ற உறுப்பினர்களுக்கான (MLA) ஊதியம் மாநிலத்திற்கு மாநிலம் மாறுபடும். தமிழகத்தைப் பொறுத்தவரை, கடந்த 2008-ல் வெறும் 30 ஆயிரம் ரூபாயாக இருந்த எம்.எல்.ஏ-க்களின் மாதாந்திர ஊதியம், படிப்படியாக உயர்ந்து 2017-ஆம் ஆண்டு முதல் 1 லட்சத்து 5 ஆயிரம் ரூபாயாக நடைமுறையில் உள்ளது. இதில் சுவாரசியமான விஷயம் என்னவென்றால், அமைச்சர்களுக்கு எனத் தனியாகச் சம்பளம் கிடையாது; எம்.எல்.ஏ-க்களுக்கு வழங்கப்படும் அதே ஊதியமே அவர்களுக்கும் வழங்கப்படுகிறது.

முதலமைச்சர், சபாநாயகர், அமைச்சர்கள் மற்றும் சட்டமன்ற உறுப்பினர்கள் என மக்கள் பிரதிநிதிகள் அனைவருக்கும் அடிப்படை ஊதியம் (Basic Salary) என்பது 30 ஆயிரம் ரூபாய் மட்டுமே. இந்த அடிப்படைச் சம்பளத்துடன் பல்வேறு படிகள் (Allowances) சேர்க்கப்பட்டுதான் மொத்த ஊதியமாக வழங்கப்படுகிறது. அதன்படி, தொகுதிப் படி 25 ஆயிரம் ரூபாய், வாகனப் படி 25 ஆயிரம் ரூபாய், மாதாந்திரப் படி 10 ஆயிரம் ரூபாய் எனப் பிரிக்கப்பட்டு கைக்குக் கிடைக்கிறது. இதுதவிர, தொலைபேசி மற்றும் அஞ்சல் செலவுகளுக்கான தொகையும் தனியாக ஒதுக்கப்படும். எம்.எல்.ஏ-க்களை விட அமைச்சர்களுக்குக் கூடுதலாக அரசு இல்லமும், அரசு வாகனமும் அதிகாரப்பூர்வமாக வழங்கப்படும்.

சட்டமன்ற உறுப்பினர்களுக்குப் பணி நிமித்தமாகப் பல்வேறு இலவச சலுகைகளும் சட்டப்படியாகக் கிடைக்கின்றன. அதன்படி, அவர்கள் பயணம் செய்வதற்கான ரயில், பேருந்து மற்றும் விமான டிக்கெட்டுகள் முற்றிலும் இலவசமாக அளிக்கப்படும். தங்களது தொகுதியில் ஒரு அலுவலகத்தை நிர்வகிப்பதற்கும், அதற்குத் தேவையான ஒரு உதவியாளரை வேலைக்கு அமர்த்துவதற்கும் தனியாக ஊதியம் அரசாங்கத்தால் வழங்கப்படும். மேலும், சட்டமன்றக் கூட்டத்தொடர் நடைபெறும் நாட்களிலோ அல்லது துறை சார்ந்த ஆலோசனைக் கூட்டங்களில் பங்கேற்கும் போதோ, தினசரிப் படியாக (Daily Allowance) தலா 2,500 ரூபாய் வரை அவர்களுக்குக் கூடுதலாக வழங்கப்படுகிறது.

அமைச்சரவையின் தலைவரான முதலமைச்சருக்கு ஒட்டுமொத்தமாக மாதச் சம்பளமாக 2 லட்சத்து 5 ஆயிரம் ரூபாய் வரை கிடைக்கும். அத்துடன், பாதுகாப்பு மற்றும் பயணங்களுக்காகப் பல விசேஷ சலுகைகளும் முதலமைச்சருக்கு உண்டு. அவரது பயன்பாட்டிற்காகக் குண்டு துளைக்காத 3 சொகுசு கார்கள் வழங்கப்படும்; இதற்கான பெட்ரோல், டீசல் அலவன்ஸாக மட்டும் மாதத்திற்கு 1 லட்சம் ரூபாய் வரை அரசாங்கத்தால் ஒதுக்கப்படுகிறது. மேலும், அச்சுறுத்தல்களின் அடிப்படையில் மத்திய உள்துறை அமைச்சகத்தால் வழங்கப்படும் உயரிய ‘இசட் பிளஸ்’ (Z+) பாதுகாப்பும் இவருக்கு அளிக்கப்படுகிறது. இந்த பாதுகாப்பின் கீழ், கமாண்டோக்கள், கான்வாய் வாகனங்கள், ஆயுதம் ஏந்திய காவலர்களின் அடுக்கு பாதுகாப்பு மற்றும் சிக்னல்களைத் துண்டிக்கும் ஜாமர் கருவி பொருத்தப்பட்ட அதிநவீன வாகனமும் முதலமைச்சரின் பாதுகாப்புப் படையில் எப்போதும் பயணிக்கும்.