தமிழக உள்ளாட்சி அமைப்புகளான மாநகராட்சி, நகராட்சி மற்றும் பேரூராட்சி மன்றக் கூட்டங்களில் யார் எங்கே அமர வேண்டும் என்பதில் நிலவிவந்த குழப்பத்திற்குத் தீர்வாக, தமிழக அரசு புதிய வழிகாட்டு நெறிமுறைகளை வெளியிட்டுள்ளது. நகராட்சி நிர்வாகம் மற்றும் குடிநீர் வழங்கல் துறை கூடுதல் தலைமைச் செயலாளர் ககன்தீப் சிங் பேடி வெளியிட்டுள்ள இந்த சுற்றறிக்கை, சென்னை தவிர்த்த அனைத்து உள்ளாட்சி அமைப்புகளிலும் உடனடியாக அமலுக்கு வருகிறது. இதன் மூலம் கூட்டங்களை எவ்விதக் குழப்பமுமின்றி முறையாக நடத்த வழிவகை செய்யப்பட்டுள்ளது.
புதிய விதிகளின்படி, மன்றக் கூட்ட அரங்கின் மைய மேடையில் மேயர் அல்லது தலைவர் அமருவார். அவருக்கு இடதுபுறம் துணை மேயரும், வலதுபுறம் மாநகராட்சி ஆணையர் அல்லது செயல் அலுவலரும் அமர வேண்டும். எம்பி மற்றும் எம்எல்ஏ-க்களுக்கு அரங்கில் முதன்மையான இடங்களில் இருக்கைகள் ஒதுக்கப்பட வேண்டும். வார்டு கவுன்சிலர்கள் மற்றும் நியமன உறுப்பினர்கள் மேடைக்கு எதிரே உள்ள வரிசைகளில் வார்டு எண்களின் அடிப்படையில் இடமிருந்து வலமாகவோ அல்லது வலமிருந்து இடமாகவோ அமர வைக்கப்படுவர்.
மேலும், துறை சார்ந்த அலுவலர்கள் மற்றும் செய்தியாளர்கள் கூட்ட நடவடிக்கைகளைக் கவனிக்கப் போதுமான இடவசதி செய்து தரப்படும். தலைவரின் முன்அனுமதி பெற்ற பார்வையாளர்கள் அவையின் மாண்பைக் காக்கும் வகையில் உறுப்பினர்களின் இருக்கைகளுக்குப் பின்னால் அமர அனுமதிக்கப்படுவர். இப்புதிய நடைமுறை உள்ளாட்சி மன்றங்களின் செயல்பாடுகளை மேலும் சீராகவும் ஒழுங்காகவும் மாற்ற உதவும் என எதிர்பார்க்கப்படுகிறது.