BREAKING: அதிகாலையில் தமிழக மீனவர்கள் அதிரடி கைது… இலங்கை கடற்படை அட்டூழியம்….!

தமிழகத்தின் ராமேஸ்வரத்தைச் சேர்ந்த 8 மீனவர்கள் எல்லை தாண்டி மீன் பிடித்ததாகக் கூறி இலங்கை கடற்படையினரால் கைது செய்யப்பட்டுள்ளனர். நேற்று முன்தினம் ராமேஸ்வரம் மீன்பிடித் துறைமுகத்தில் இருந்து இரண்டு விசைப்படகுகளில் கடலுக்குச் சென்ற இவர்கள், மன்னார் வளைகுடா மற்றும் நெடுந்தீவு அருகே மீன்பிடித்துக் கொண்டிருந்தபோது அங்கு வந்த இலங்கை கடற்படையினர் இவர்களைச் சுற்றி வளைத்தனர். மீனவர்கள் சர்வதேச கடல் எல்லைக் கோட்டைத் தாண்டியதாகக் குற்றம் சாட்டப்பட்டு, அவர்களின் படகுகளுடன் சேர்த்து கைது செய்யப்பட்டு விசாரணைக்காக இலங்கை கடற்படை முகாமிற்கு அழைத்துச் செல்லப்பட்டனர்.

தொடர்ச்சியாக அரங்கேறி வரும் இத்தகைய கைது நடவடிக்கைகள் தமிழக கடலோர மீனவ கிராமங்களில் பெரும் சோகத்தையும் கொந்தளிப்பையும் ஏற்படுத்தியுள்ளன. வாழ்வாதாரத்திற்காகக் கடலை மட்டுமே நம்பியிருக்கும் மீனவர்கள் மீது இலங்கை கடற்படை மேற்கொள்ளும் இந்த அடக்குமுறைக்கு முற்றுப்புள்ளி வைக்க வேண்டும் என மீனவர் சங்கங்கள் வலியுறுத்தியுள்ளன. கடந்த 4-ம் தேதி மயிலாடுதுறை மாவட்ட மீனவர்கள் 9 பேர் கைது செய்யப்பட்ட நிலையில், மீண்டும் கைது படலம் தொடர்வதாக தமிழ்நாடு மீனவர்கள் சங்கம் கண்டனம் தெரிவித்துள்ளது.