தமிழக பாஜகவில் விரைவில் முக்கிய மாற்றங்கள் நடக்கலாம் என்ற தகவல் அரசியல் வட்டாரங்களில் தற்போது பெரும் பரபரப்பை ஏற்படுத்தியுள்ளது. அண்மையில் நடைபெற்ற சட்டப்பேரவைத் தேர்தலில் கட்சி எதிர்பார்த்த வெற்றியைப் பெறத் தவறியது ஒருபுறமிருக்க, முன்னாள் மாநிலத் தலைவர் அண்ணாமலை பாஜகவிலிருந்து விலகி ‘வீ த லீடர்ஸ்’ என்ற புதிய இயக்கத்தைத் தொடங்கியிருப்பது கட்சிக்குள் பலத்த அதிர்வலைகளை உருவாக்கியுள்ளது. அண்ணாமலையின் இந்த அதிரடி முடிவைத் தொடர்ந்து, அவருடன் நெருக்கமாகச் செயல்பட்ட முக்கிய நிர்வாகிகள் சிலரும் கட்சியை விட்டு வெளியேறியதால், தமிழகத்தில் பாஜவின் அடித்தளத்தை மீண்டும் பலப்படுத்த வேண்டிய கட்டாயத்திற்கு தேசிய தலைமை தள்ளப்பட்டுள்ளது.
கடந்த சட்டப்பேரவைத் தேர்தலில் மிகப்பெரிய எதிர்பார்ப்புகளுடன் களம் கண்ட பாஜக, வெறும் ஒரு தொகுதியில் மட்டுமே வெற்றி பெற்று பெரும் பின்னடைவைச் சந்தித்தது. இந்தத் தோல்வியைத் தொடர்ந்து, கட்சியின் தேர்தல் வியூகங்கள், கூட்டணி அரசியல் மற்றும் உட்கட்சி அமைப்புச் செயல்பாடுகள் குறித்து பல மூத்த நிர்வாகிகள் தங்களது கடும் அதிருப்தியை வெளிப்படுத்தி வந்தனர். இந்தச் சூழலில், அண்ணாமலையின் விலகலும் சேர்ந்துகொண்டதால், தமிழக பாஜக அமைப்பை முழுமையாக மறுசீரமைக்கும் அதிரடி நடவடிக்கைகளில் டெல்லி தலைமை தற்போது தீவிரமாக இறங்கியுள்ளதாகக் கூறப்படுகிறது.
இதன் ஒரு பகுதியாக, தற்போதைய மாநிலத் தலைவர் நயினார் நாகேந்திரன் விரைவில் மாற்றப்படலாம் என்ற தகவல் அரசியல் வட்டாரங்களில் பலமாக உலா வருகிறது. அவருக்கு தேசிய அளவிலோ அல்லது மத்திய அரசிலோ முக்கிய பொறுப்புகள் வழங்கப்படலாம் என எதிர்பார்க்கப்படும் நிலையில், புதிய தலைவரைத் தேர்ந்தெடுப்பதற்கான ஆலோசனைக் கூட்டம் டெல்லியில் அமித் ஷா மற்றும் தேசியத் தலைவர் நிதின் நபின் தலைமையில் அண்மையில் நடைபெற்றது. எல். முருகன், பொன். ராதாகிருஷ்ணன், தமிழிசை சவுந்தரராஜன் மற்றும் வானதி சீனிவாசன் உள்ளிட்ட தமிழகத்தின் முக்கியத் தலைவர்கள் கலந்துகொண்ட இக்கூட்டத்தில், தேர்தல் தோல்விக்கான காரணங்கள் மற்றும் கட்சியின் எதிர்காலத் திட்டங்கள் குறித்து விரிவாக விவாதிக்கப்பட்டுள்ளது.
புதிய மாநிலத் தலைவர் பதவிக்கான போட்டியில் பேராசிரியர் ராம சீனிவாசன், மாநிலச் செயலாளர் அஸ்வத்தாமன், வினோஜ் பி. செல்வம் மற்றும் ஹெச். ராஜா ஆகிய நான்கு பேரின் பெயர்கள் டெல்லி தலைமையின் பரிசீலனைப் பட்டியலில் முன்னிலையில் உள்ளன. இதில் கல்வியாளராகவும் நீண்டகால அமைப்பாளராகவும் அறியப்படும் பேராசிரியர் ராம சீனிவாசனின் பெயர் அதிகமாக பேசப்பட்டாலும், கட்சியின் அடிமட்டத் தொண்டர்களிடம் செல்வாக்கு மிக்க ஹெச். ராஜா மற்றும் இளைஞர்களின் பிரதிநிதியாகப் பார்க்கப்படும் வினோஜ் பி. செல்வம் ஆகியோருக்கும் வாய்ப்புகள் இருப்பதாகக் கூறப்படுகிறது. அண்ணாமலையின் வெளியேற்றத்திற்குப் பின் தமிழக பாஜக சந்தித்து வரும் அரசியல் சவால்களைச் சமாளிக்க, இந்தத் தலைமை மாற்றம் தவிர்க்க முடியாத ஒன்றாக மாறியுள்ள நிலையில், புதிய தலைவர் யார் என்ற அதிகாரப்பூர்வ அறிவிப்பை நோக்கி ஒட்டுமொத்த தமிழக அரசியலும் காத்திருக்கிறது.