தமிழ் சினிமாவில் முற்போக்கு சிந்தனைகளுடன் திரைப்படங்களை கொடுத்த பெருமைக்கு சொந்தக்காரர் தான் எம் ஆர் ராதா. நாடக நடிகராக இருந்து சினிமாவில் காமெடி, குணச்சித்திரம், ஹீரோ மற்றும் வில்லன் என பலதரப்பட்ட கேரக்டர்களில் நடித்து புகழ்பெற்றவர். அதே சமயம் பல நடிகர்களுக்கு முன்னோடியாகவும் இவ்வாறு திகழ்ந்துள்ளார். எம்ஜிஆர் மற்றும் சிவாஜி உள்ளிட்ட முன்னணி நடிகர்களின் திரைப்படங்களில் வில்லனாகவும் இவர் நடித்துள்ளார். எம் ஆர் ராதா சினிமாவில் முன்னணி நடிகராக இருந்த போதும் நாடகங்களில் நடிப்பதை விடவில்லை. அதன்படி ஒரு முறை இராமாயணத்தை கிண்டல் செய்து ஒரு நாடகத்தை இவர் நடத்தினார்.
/indian-express-tamil/media/media_files/gjFk172NT9KeHRkOJEl1.jpg)
அந்த நாடகத்தைப் பார்த்த மக்கள் பலரும் தங்கள் மனதை புண்படுத்தும் வகையில் உள்ளது என்று கூறி வந்த நிலையில் ஒரு சிலர் எம்ஆர் ராதாவிடமே நாடகம் எங்களுக்கு மனதை காயப்படுத்தும் வகையில் உள்ளது என்று கூறிவிட்டனர். இதனை ஏற்றுக் கொண்ட எம் ஆர் ராதா அடுத்த நாள் இந்த நாடகத்தை பார்க்க வருகிறவர்கள் வரலாம் ஆனால் தங்கள் மனம் புண்பட்டுள்ளதாக உணரும் எவரும் இந்த நாடகத்தை பார்க்க வர வேண்டாம், அவர்களின் காசு எனக்கு வேண்டாம், இதை பொருட்படுத்தாமல் நாடகத்தை நீங்கள் பார்க்க வந்து உங்கள் மனம் புண்பட்டால் அதற்கு நான் பொறுப்பல்ல என்று ஒரு போஸ்டரை அடித்து ஒட்டி உள்ளார். இதே மாதிரி திருச்சியில் கடவுள் இல்லை என்று எம் ஆர் ராதா ஒரு நாடகம் போட்டுள்ளார்.
அப்போது எதார்த்தம் பொன்னுசாமி பிள்ளையும் கவிஞர் பாரதியும் அந்த நாடகத்தை பார்க்க சென்றுள்ளனர். நாடக முடிந்த பிறகு எதார்த்தம் பொன்னுசாமி பிள்ளை, என்ன ராதா கடவுள் இல்லை கடவுள் இல்லை என்று சொல்லி நாடகம் போட்டுட்டு இருக்க, கடவுள் நம்பிக்கை இருக்கவங்க எல்லாம் உன் நாடகத்தை பார்க்க வராங்க, இதனால அவங்க மனசு புண்படுது என அவர் கூறியுள்ளார். இதைக் கேட்ட எம் ஆர் ராதா, ஏங்க அவ்வளவு பெரிய கடவுள் நான் சொன்னா இல்லாம போயிடுவாரா என்று பதில் சொல்லியுள்ளார். இந்த தகவலை கவிஞர் வாலி ஒரு பேட்டியில் பகிர்ந்துள்ளார்.