ஆந்திரப் பிரதேச மாநிலத்தில் காதல் திருமணம் செய்துகொண்ட மணமகன், முதலிரவுக்காகக் காத்திருந்த நேரத்தில் கௌரவக் கொலை செய்யப்பட்ட சம்பவம் பெரும் அதிர்ச்சியை ஏற்படுத்தியுள்ளது. கிழக்கு கோதாவரி மாவட்டம் வேமுலபள்ளி கிராமத்தைச் சேர்ந்த 41 வயதான சூரியபிரகாஷ் என்பவர், ராயவரத்தில் துணை வட்டாட்சியராகப் பணியாற்றி வரும் 40 வயது சந்தியாவை நீண்ட நாட்களாகக் காதலித்து வந்துள்ளார். இவர்களது காதலுக்குப் பெண் வீட்டார் கடும் எதிர்ப்பு தெரிவித்த நிலையில், கடந்த வியாழக்கிழமை அன்னவரம் கோயிலில் வைத்து இருவரும் தங்களது விருப்பப்படி திருமணம் செய்து கொண்டனர்.
திருமணம் முடிந்த கையோடு சந்தியா தனது திருமணப் புகைப்படங்களைத் தனது சகோதரர்களுக்கு அலைபேசி வாயிலாக அனுப்பியுள்ளார். வேலையில்லாத ஒருவரைத் தனது தங்கை திருமணம் செய்துகொண்டதை அறிந்த சகோதரர்கள் கடும் ஆத்திரமடைந்தனர். எப்படியும் முதலிரவு கொண்டாட்டத்திற்காகச் சூரியபிரகாஷ் தனது வீட்டிற்கு வருவார் என்பதை அறிந்த அவர்கள், அவரைக் கொலை செய்யத் திட்டமிட்டு வீட்டின் அருகே மறைந்திருந்து காத்திருந்தனர்.
அன்றைய தினம் இரவு சுமார் 11:30 மணியளவில் சூரியபிரகாஷ் வீட்டிற்கு வந்தபோது, அங்கு மறைந்திருந்த சந்தியாவின் சகோதரர்கள் மற்றும் அவர்களது நண்பர் சேர்ந்து கற்களாலும் ஆயுதங்களாலும் அவரை மிகக் கொடூரமாகத் தாக்கியுள்ளனர். இந்தத் தாக்குதலில் பலத்த காயமடைந்த சூரியபிரகாஷ் ரத்த வெள்ளத்தில் சம்பவ இடத்திலேயே பரிதாபமாக உயிரிழந்தார். ஆசையாய் இல்லற வாழ்க்கையைத் தொடங்கவிருந்த மணமகன், திருமணமான இரண்டே நாட்களில் கொலை செய்யப்பட்டது அந்தப் பகுதியில் பெரும் சோகத்தை ஏற்படுத்தியுள்ளது.
தகவலறிந்து வந்த போலீஸார் சூரியபிரகாஷின் உடலைக் கைப்பற்றிப் பிரேதப் பரிசோதனைக்கு அனுப்பி வைத்தனர். இது தொடர்பாக வழக்குப் பதிவு செய்த போலீஸார், கொலையில் தொடர்புடைய சந்தியாவின் சகோதரர்கள் உள்ளிட்ட மூன்று பேரைக் கைது செய்து விசாரணை நடத்தி வருகின்றனர். சமூகத்தில் இன்னும் வேரூன்றியிருக்கும் இத்தகைய கௌரவக் கொலைச் சம்பவங்கள் பொதுமக்களிடையே மிகுந்த கவலையையும் அச்சத்தையும் ஏற்படுத்தியுள்ளது.