தமிழ் திரையுலகில் இயக்குநர், நடிகர், இசையமைப்பாளர், பாடலாசிரியர், தயாரிப்பாளர் என பன்முகத்தன்மை கொண்ட கலைஞராகத் திகழும் டி.ராஜேந்தர், தனது 71-வது பிறந்தநாளை முன்னிட்டுச் சென்னையில் செய்தியாளர்களைச் சந்தித்துப் பேசினார். இயக்குநர் சாய் ரமணி இயக்கும் ‘கன்னடத்து பைங்கிளி’ என்ற திரைப்படத்திற்குத் தாம் பாடல் எழுதி இசையமைப்பதாகவும், இயக்குநரின் விருப்பத்திற்கு இணங்கவே இசைஞானி இளையராஜாவை அதில் ஒரு பாடலைப் பாட வைத்துள்ளதாகவும் அவர் தெரிவித்தார்.
“நான் இளையராஜாவின் தீவிர ரசிகன். அவரிடம் கேட்க முதலில் தயங்கினாலும், இசை மீதான மரியாதையால் இது சாத்தியமானது. நான் அதிக சுயமரியாதை கொண்டவன்; தஞ்சை என்று சொல்லி வாழ்வேனே தவிர, தன்மானத்தை விட்டுவிட்டு யாளிடமும் தஞ்சம் அடையமாட்டேன்” என டி.ஆர் உருக்கமாகப் பேசினார்.
80-களில் ‘ஒருதலை ராகம்’, ‘உயிருள்ளவரை உஷா’, ‘மைதிலி என்னை காதலி’ எனத் தொடர் வெற்றிப் படங்களைக் கொடுத்து, அமலா, நளினி போன்ற பல முன்னணி நட்சத்திரங்களை அறிமுகப்படுத்திய டி.ஆர், ‘கவண்’ திரைப்படத்திற்குப் பிறகு திரையுலகில் அதிகப் பணிகளை மேற்கொள்ளாமல் இடைவெளி எடுத்திருந்தார். தற்போது மீண்டும் இசை அமைப்பாளராக அவர் அவதாரம் எடுத்திருப்பது அவரது ரசிகர்களிடையே பெரும் எதிர்பார்ப்பை ஏற்படுத்தியுள்ளது.