“எனக்கு இப்போவே அது வேணும்”… அறையில் தனியாக இருந்த மோனிகா… கணவன் சொன்ன ஒற்றை வார்த்தை… காலையில் காத்திருந்த பேரதிர்ச்சி…!

திருவள்ளூர் அருகே ஏசி வாங்கித் தராத ஆத்திரத்தில் இளம் பெண் தற்கொலை செய்து கொண்ட சம்பவம் அப்பகுதியில் பெரும் அதிர்ச்சியையும் சோகத்தையும் ஏற்படுத்தியுள்ளது. திருவள்ளூர் அடுத்த பூண்டி ஜெயராம் தெருவைச் சேர்ந்த ஆகாஷ் (26) என்பவருக்கும், புல்லரம்பாக்கம் கிராமத்தைச் சேர்ந்த மோனிகா (25) என்பவருக்கும் கடந்த இரண்டு ஆண்டுகளுக்கு முன்பு காதல் திருமணம் நடைபெற்றது. பள்ளிப் பருவத்திலிருந்தே காதலித்து வந்த இவர்கள், இரு வீட்டாரின் சம்மதத்துடன் மணவாழ்க்கையில் இணைந்தனர். ஆகாஷ் துணிக்கடை ஒன்றில் விற்பனையாளராகப் பணியாற்றி வர, மோனிகா இல்லத்தரசியாக இருந்து வந்துள்ளார்.

தற்போது கோடை வெயில் வாட்டி வதைத்து வரும் நிலையில், வெப்பத்தின் தாக்கம் தாள முடியாமல் மோனிகா தனது கணவரிடம் வீட்டில் குளிர்சாதன வசதி (AC) செய்து தருமாறு கேட்டுள்ளார். ஆனால், ஒரு சாதாரண விற்பனையாளராகப் பணியாற்றும் ஆகாஷ், தற்போதுள்ள பொருளாதாரச் சூழலில் ஏசி வாங்க முடியாது என்று மறுத்துள்ளார். இதனால் தம்பதியினரிடையே கடந்த சில நாட்களாகவே அடிக்கடி வாக்குவாதமும், மனக்கசப்பும் ஏற்பட்டு வந்ததாகக் கூறப்படுகிறது.

சம்பவத்தன்று இரவு, வீட்டின் உள்ளே நிலவிய கடும் புழுக்கம் காரணமாக ஆகாஷ் மற்றும் அவரது குடும்பத்தினர் அனைவரும் வீட்டின் மொட்டை மாடிக்குச் சென்று உறங்கியுள்ளனர். மோனிகா மட்டும் அறையில் தனியாகத் தங்கியுள்ளார். மறுநாள் காலை ஆகாஷ் கீழே வந்து பார்த்தபோது, மோனிகா தனது புடவையால் மின்விசிறியில் தூக்கிட்டுத் தற்கொலை செய்து கொண்டிருப்பதைக் கண்டு உறைந்து போனார். அன்பால் இணைந்த தம்பதியினர் இடையே ஒரு வசதி வாய்ப்புக்காக ஏற்பட்ட மோதல், இப்படி ஒரு விபரீத முடிவில் முடிந்திருப்பது காண்போரை கண்கலங்க வைத்துள்ளது.

தகவலறிந்து வந்த புல்லரம்பாக்கம் காவல்துறையினர், மோனிகாவின் உடலைக் கைப்பற்றி பிரேதப் பரிசோதனைக்காகத் திருவள்ளூர் அரசு மருத்துவமனைக்கு அனுப்பி வைத்தனர். இது தொடர்பாக வழக்குப் பதிவு செய்துள்ள போலீசார், திருமணமான இரண்டு ஆண்டுகளிலேயே இந்தத் தற்கொலை நடந்துள்ளதால், ஏசி விவகாரம் தவிர வேறு ஏதேனும் வரதட்சணை கொடுமையோ அல்லது குடும்பப் பிரச்சினைகளோ காரணமா என்ற கோணத்தில் தீவிர விசாரணை நடத்தி வருகின்றனர். ஒரு சிறிய ஆசை நிறைவேறாத கோபத்தில் இளம் பெண் உயிரை மாய்த்துக் கொண்ட சம்பவம் அந்த கிராமத்தையே சோகத்தில் ஆழ்த்தியுள்ளது.