தமிழக அரசியலில் பெரும் பரபரப்பை ஏற்படுத்திய அதிமுக உட்கட்சி மோதல், தற்போது எடப்பாடி பழனிசாமிக்குச் சாதகமாக ஒரு முக்கிய திருப்பத்தை எட்டியுள்ளது. சமீபத்திய சட்டமன்றத் தேர்தலுக்குப் பிறகு, பொதுச்செயலாளர் எடப்பாடி பழனிசாமி தலைமையிலான ஒரு அணியாகவும், முன்னாள் அமைச்சர்கள் எஸ்.பி.வேலுமணி, சி.வி.சண்முகம் தலைமையிலான மற்றொரு அணியாகவும் அதிமுக இரண்டு பிரிவுகளாகச் செயல்பட்டு வந்தது. இந்தச் சூழலில், வேலுமணி அணியைச் சேர்ந்த 6 எம்.எல்.ஏ.க்கள் எடப்பாடி பழனிசாமியை நேரில் சந்தித்து ஆதரவு தெரிவித்ததுடன் மன்னிப்பு கடிதமும் அளித்தனர். அதேநேரத்தில், மரகதம் குமரவேல், சத்யபாமா உள்ளிட்ட 4 எம்.எல்.ஏ.க்கள் தங்கள் பதவியை ராஜினாமா செய்துவிட்டு த.வெ.க.வில் இணைந்தது அரசியல் களத்தில் பெரும் அதிர்வலைகளை உருவாக்கியது.
இந்த அதிரடி நகர்வுகளால் எஸ்.பி.வேலுமணி தரப்பில் இருந்த எம்.எல்.ஏ.க்களின் எண்ணிக்கை 15 ஆகக் குறைய, எடப்பாடி பழனிசாமி தரப்பின் பலம் 28 ஆக உயர்ந்தது. இதனால் தனிமைப்படுத்தப்படுவதைத் தவிர்க்கவும், தங்களின் அரசியல் இருத்தலைத் தக்கவைத்துக் கொள்ளவும் வேலுமணி தரப்பினர் எதார்த்தமான முடிவுக்கு வர வேண்டிய கட்டாயம் ஏற்பட்டது. இதனைத் தொடர்ந்து, நத்தம் விஸ்வநாதன் உள்ளிட்ட 14 எம்.எல்.ஏ.க்கள் பசுமை வழிச்சாலையில் உள்ள எடப்பாடி பழனிசாமியின் இல்லத்திற்கு நேரில் சென்று, அவருடன் இணக்கமாகச் செல்ல பேச்சுவார்த்தை நடத்தினர். எடப்பாடி பழனிசாமியின் வசமே பெரும்பான்மை பலம் இருப்பதால், அவருக்கு எதிராகத் தொடர்ந்து செயல்படுவது தங்களின் எம்.எல்.ஏ. பதவியையே கேள்விக்குறியாக்கும் என்பதை உணர்ந்தே அவர்கள் இந்த முடிவை எடுத்துள்ளனர்.
அரசியல் ரீதியாகத் தனிமைப்பட்டு விடக்கூடாது என்பதும், இழந்த கட்சிப் பதவிகளை மீண்டும் பெற்று கௌரவமான இடத்தைப் பிடிக்க வேண்டும் என்பதுமே இந்தச் சமரச முயற்சிக்கு முதன்மைக் காரணமாக அரசியல் விமர்சகர்கள் கருதுகிறார்கள். இரு அணிகளும் முறைப்படி இணைந்தால் மட்டுமே, சபாநாயகரிடம் அளிக்கப்பட்டுள்ள கட்சித் தாவல் தடைச் சட்டத்தின் கீழ் தொடரப்பட்ட வழக்குகளைத் திரும்பப் பெற முடியும் என்ற சூழலும் நிலவுகிறது. எனவே, இந்தச் சந்திப்பு வெறும் தற்காலிக அமைதியா அல்லது அதிமுகவின் நிரந்தர ஒன்றிணைப்பா என்பது அடுத்தடுத்த நாட்களில் முழுமையாகத் தெரியவரும்.
அதே சமயம், இந்த முக்கிய சமரச முயற்சியில் சி.வி.சண்முகம் கலந்து கொள்ளாதது அரசியல் வட்டாரத்தில் பெரும் விவாதங்களையும் கேள்விகளையும் எழுப்பியுள்ளது. ராஜ்யசபா பதவியை ராஜினாமா செய்யக் கோரியது மற்றும் கட்சியின் தோல்விக்கான காரணங்களை முறையாக ஆய்வு செய்யாதது உள்ளிட்ட விவகாரங்களில் அவர் கட்சித் தலைமையுடன் கடும் அதிருப்தியில் இருப்பதாகக் கூறப்படுகிறது. எனினும், தனி அணி அமைத்துச் செயல்பட்டதால் செல்வாக்கை இழந்துள்ள சி.வி.சண்முகம், ஆளுங்கட்சியான த.வெ.க.விலும் பெரிய அதிகாரங்கள் கிடைக்காத சூழலில், தனது எம்.எல்.ஏ. பதவியைக் காப்பாற்றிக் கொள்ள எடப்பாடி பழனிசாமியுடன் சமரசம் ஆவதைத் தவிர வேறு வழியில்லை என்றும், அவர் அடுத்து என்ன முடிவெடுக்கப் போகிறார் என்ற ஆர்வம் அதிகரித்துள்ளதாகவும் விமர்சகர்கள் குறிப்பிடுகின்றனர்.