இனி இப்படித்தான் இருக்கணும்..! அயோத்தி ராமர் கோயில் பூசாரிகளுக்கு வந்த திடீர் கட்டுப்பாடு… ஷாக் கொடுத்த அறக்கட்டளை…!!

அயோத்தி ஸ்ரீ ராமர் ஆலயத்தில் பணியாற்றும் அர்ச்சகர்களுக்கான புதிய ஆடைக் கட்டுப்பாடு மற்றும் நெறிமுறைகள் கடந்த ஆகஸ்ட் 15-ஆம் தேதி முதல் நடைமுறைக்கு வந்துள்ளன. புதிய விதிகளின்படி, அர்ச்சகர்கள் ராமநந்தி சம்பிரதாயத்தை முழுமையாகப் பின்பற்றி, வெளிர் மஞ்சள் நிறத்திலான பட்டு வேட்டி மற்றும் மேலாடையை மட்டுமே அணிய வேண்டும். ஆடை மட்டுமின்றி அவர்களின் தோற்றத்திலும் சில முக்கிய கட்டுப்பாடுகள் விதிக்கப்பட்டுள்ளன. நெற்றியில் ராமநந்தி திலகம் இடுவது கட்டாயமாக்கப்பட்டுள்ளது. மேலும், முகத்தை முழுமையாகச் சவரம் செய்திருக்க வேண்டும் அல்லது மரபுப்படி ‘பஞ்சகேச’ முறையைப் பின்பற்ற வேண்டும்; மாறாக, தாடி மற்றும் முடிகளைச் சீரற்ற முறையில் அரைகுறையாக வளர்த்து வைத்திருக்கக் கூடாது.

வழிபாட்டு நிகழ்வுகளில் கூடுதல் தூய்மையையும், சிறப்பான ஒழுக்கத்தையும் நிலைநிறுத்தும் நோக்கிலேயே இந்த குறிப்பிட்ட நிறமும் விதிகளும் தேர்வு செய்யப்பட்டுள்ளன. ஸ்ரீ ராம ஜென்மபூமி தீர்த்த க்ஷேத்ரா அறக்கட்டளையின் வழிகாட்டுதலின் பேரில் அறிமுகப்படுத்தப்பட்டுள்ள இந்த மாற்றங்கள், ஆலயத்தின் புனிதத்தன்மையையும் தொன்மையான பாரம்பரியத்தையும் மேலும் மெருகூட்டும் என எதிர்பார்க்கப்படுகிறது. இதற்கிடையில், கோயில் நிர்வாகப் பணிகளை மேம்படுத்துவதற்காக அறக்கட்டளைக்கு புதிய தலைமைச் செயல் அதிகாரியை தேர்ந்தெடுப்பதற்கான நடவடிக்கைகளும் தற்போது மும்முரமாக நடைபெற்று வருகின்றன.