ஐயோ இப்படியா ஆகணும்?…. “15 அடி ஏணி… உயர்மின்னழுத்த கம்பி”… துடிதுடித்து முடிந்த பள்ளி மாணவனின் வாழ்க்கை….!

செங்கல்பட்டு மாவட்டம் மாமல்லபுரம் அருகே உள்ள தனியார் உணவகம் ஒன்றில் பெயர் பலகை அமைக்கும் பணியின் போது ஏற்பட்ட மின் விபத்தில், பிளஸ் 2 பொதுத்தேர்வு எழுதவிருந்த பள்ளி மாணவன் உயிரிழந்த சம்பவம் பெரும் சோகத்தை ஏற்படுத்தியுள்ளது. மறைமலைநகர் பகுதியைச் சேர்ந்த 18 வயது மாணவன் பிரவீன், செங்கல்பட்டில் உள்ள ஒரு தனியார் பள்ளியில் 12-ஆம் வகுப்பு பயின்று வந்தார். இன்னும் சில நாட்களில் தனது எதிர்காலத்தை தீர்மானிக்கும் பொதுத்தேர்வை எழுத வேண்டிய நிலையில், வறுமையின் காரணமாக பகுதிநேர வேலைக்குச் சென்ற இடத்தில் அவர் உயிர் பிரிந்தது அனைவரையும் அதிர்ச்சியில் ஆழ்த்தியுள்ளது.

சம்பவத்தன்று, மாமல்லபுரம் கிழக்கு கடற்கரை சாலையில் உள்ள ஒரு தனியார் ஓட்டலில் பெயர் பலகை பொருத்தும் பணிக்காக ஒப்பந்ததாரர் மூலம் பிரவீன் மற்றும் அரசு (22) என்ற இளைஞர் அழைத்து வரப்பட்டனர். பணியின் போது, சுமார் 15 அடி உயரமுள்ள அலுமினிய ஏணியை அவர்கள் நகர்த்தியபோது, எதிர்பாராதவிதமாக மேலே சென்ற உயர்மின்னழுத்த கம்பி ஏணியில் உரசியது. இதில் மின்சாரம் பாய்ந்ததில் இருவரும் தூக்கி வீசப்பட்டனர். இதில் மாணவன் பிரவீன் சம்பவ இடத்திலேயே உடல் கருகி பலியானார், மற்றொரு இளைஞர் அரசு படுகாயங்களுடன் மருத்துவமனையில் அனுமதிக்கப்பட்டுள்ளார்.

இந்தத் தகவல் அறிந்ததும் பிரவீனின் உறவினர்கள் மற்றும் மறைமலைநகர் பகுதியைச் சேர்ந்த இளைஞர்கள் அந்த தனியார் ஓட்டல் முன்பு திரண்டு முற்றுகையிட்டனர். “இன்னும் ஓரிரு நாட்களில் பொதுத்தேர்வு எழுத வேண்டிய ஒரு பள்ளி மாணவனுக்கு, முறையான பாதுகாப்பு உபகரணங்கள் இன்றி எப்படி வேலை கொடுத்தீர்கள்?” என்றும், “அவனது உயிரை மீட்டுத் தர முடியுமா?” என்றும் ஆவேசமாகக் கேள்வி எழுப்பினர். இதனால் அந்த பகுதியில் பெரும் பரபரப்பு ஏற்பட்டது. தகவலறிந்து வந்த மாமல்லபுரம் காவல்துறையினர் உடலைக் கைப்பற்றி பிரேதப் பரிசோதனைக்கு அனுப்பி வைத்ததுடன், இந்த விபத்து குறித்து வழக்குப் பதிவு செய்து விசாரணை நடத்தி வருகின்றனர்.

கல்வி கற்று முன்னேற வேண்டிய வயதில், குடும்பச் சூழ்நிலை காரணமாக வேலைக்குச் சென்ற மாணவனின் இந்த முடிவு, கல்வித் துறை மற்றும் சமூக ஆர்வலர்களிடையே பெரும் கவலையை ஏற்படுத்தியுள்ளது. ஒரு திறமையான மாணவனின் கனவுகள் மின் விபத்தால் கருகிப் போனது ஈடுசெய்ய முடியாத இழப்பாகும். இதுபோன்ற அபாயகரமான பணிகளில் மாணவர்களை ஈடுபடுத்துவதைத் தவிர்க்கவும், உரிய பாதுகாப்பு விதிமுறைகளை ஒப்பந்ததாரர்கள் பின்பற்றுவதை உறுதி செய்யவும் அரசு கடுமையான நடவடிக்கை எடுக்க வேண்டும் என்பதே அனைவரின் கோரிக்கையாக உள்ளது.