“என் பிள்ளை படிக்க 20 லட்சம் கட்டினேன்” ஆனா அவன் உயிரே போயிடுச்சே.. கல்லூரி மைதானத்தில் பலியான மகன்: கதறும் தந்தை..!!

உத்தரப் பிரதேச மாநிலம் பஸ்தி மாவட்டத்தைச் சேர்ந்த விஷால் வர்மா என்ற 20 வயது மாணவர், புனேவில் உள்ள ஒரு கல்லூரியில் மரைன் இன்ஜினியரிங் இரண்டாம் ஆண்டு பயின்று வந்தார். கடந்த ஞாயிற்றுக்கிழமை காலை, கல்லூரி வளாகத்தில் உடற்பயிற்சி செய்து கொண்டிருந்தபோது, எதிர்பாராத விதமாக அங்கிருந்த கூடைப்பந்து (Basketball) கம்பம் அவர் மீது சரிந்து விழுந்தது. இதில் பலத்த காயமடைந்த விஷால், சிகிச்சை பலனின்றி உயிரிழந்தார்.

தனது மகனை ஒரு சிறந்த பொறியாளராக மாற்ற வேண்டும் என்ற கனவோடு, கடந்த இரண்டு ஆண்டுகளில் சுமார் 20 லட்சம் ரூபாய் வரை தந்தை பாபுராம் வர்மா கட்டணமாகச் செலுத்தியுள்ளார். “எந்தக் கல்லூரியில் என் மகனின் எதிர்காலம் சிறப்பாக அமையும் என்று நம்பினேனோ, அதே கல்லூரி இன்று அவனது கல்லறையாக மாறிவிட்டது” என்று அவர் கதறி அழுவது பார்ப்போரை கண்கலங்கச் செய்துள்ளது. கல்லூரி நிர்வாகத்தின் அலட்சியமே இந்த விபத்திற்குக் காரணம் என அவர் குற்றம் சாட்டியுள்ளார்.

இந்தச் சம்பவம் தொடர்பாகப் போலீஸார் வழக்குப் பதிவு செய்து விசாரணை நடத்தி வருகின்றனர். விளையாட்டு மைதானத்தில் இருந்த அந்த இரும்புக் கம்பம் சரியாகப் பராமரிக்கப்பட்டதா அல்லது அதன் உறுதித்தன்மையில் ஏதேனும் குறைபாடு இருந்ததா என்பது குறித்து மாணவர்களிடமும் கல்லூரி நிர்வாகத்திடமும் வாக்குமூலம் பெறப்பட்டு வருகிறது. ஒரு திறமையான மாணவன் போதிய பாதுகாப்பு வசதிகள் இல்லாததால் உயிரிழந்தது அப்பகுதியில் பெரும் சோகத்தை ஏற்படுத்தியுள்ளது.