தமிழக சட்டசபை தேர்தல் களம் தற்போது உச்சக்கட்ட பரபரப்பை எட்டியுள்ளது. வரும் ஏப்ரல் 24-ம் தேதி வாக்குப்பதிவு நடைபெறவுள்ள நிலையில், சிஎன்என் – நியூஸ் 18 நிறுவனம் நடத்திய தேர்தலுக்கு முந்தைய விரிவான கருத்துக்கணிப்பு முடிவுகள் வெளியாகியுள்ளன. சுமார் 7,992 பேரிடம் நடத்தப்பட்ட இந்த ஆய்வில், அடுத்த முதலமைச்சர் யார் என்பதில் தற்போதைய முதல்வர் மு.க.ஸ்டாலின் மற்றும் எதிர்க்கட்சித் தலைவர் எடப்பாடி பழனிசாமி ஆகியோருக்கு இடையே மிகக் கடுமையான போட்டி நிலவுவது தெரியவந்துள்ளது.
முதலமைச்சர் வேட்பாளர் குறித்த கேள்விக்கு, 39.9 சதவீத மக்கள் மு.க.ஸ்டாலின் மீண்டும் முதல்வராக வேண்டும் என விருப்பம் தெரிவித்துள்ளனர். அவருக்கு மிக நெருக்கமாக 37.5 சதவீத ஆதரவுடன் எடப்பாடி பழனிசாமி இரண்டாம் இடத்தில் உள்ளார். இவர்களுக்கு இடையேயான இடைவெளி வெறும் 2.4 சதவீதம் மட்டுமே என்பது குறிப்பிடத்தக்கது. ஜாதி ரீதியான ஆதரவைப் பொறுத்தவரை, பட்டியலின மக்கள் மற்றும் சிறுபான்மையினர் திமுக அரசுக்கு அதிக ஆதரவு அளித்துள்ளனர். அதேசமயம், பிற்படுத்தப்பட்டோர் மற்றும் முன்னேறிய சமூகத்தினர் எடப்பாடி பழனிசாமி முதல்வராக வர வேண்டும் என விரும்புவதாக இந்த ஆய்வு கூறுகிறது.
தேர்தலில் எதிரொலிக்கப் போகும் முக்கியப் பிரச்சனைகளாக மது மற்றும் போதைப்பொருள் புழக்கம் (20.1%) முதலிடத்தில் உள்ளது. இதனைத் தொடர்ந்து பெண்கள் பாதுகாப்பு (17.8%) மற்றும் சட்டம்-ஒழுங்கு (17.3%) குறித்த அச்சங்கள் மக்கள் மத்தியில் அதிகம் காணப்படுகின்றன. குறிப்பாக, தலித் இளைஞர்கள் மத்தியில் வேலையின்மை மிகப்பெரிய கவலையாக உருவெடுத்துள்ளது. ஊழல் மற்றும் நிர்வாகத் திறன் குறித்த மாறுபட்ட கருத்துக்கள் வெவ்வேறு சமூகத்தினர் இடையே நிலவுவதை இந்த சர்வே சுட்டிக்காட்டுகிறது.
இந்த தேர்தல் மும்முனைப் போட்டியா அல்லது இருமுனைப் போட்டியா என்ற கேள்விக்கு, 41.2 சதவீத மக்கள் இது திமுக மற்றும் அதிமுக இடையேயான நேரடிப் போட்டிதான் என்று தெரிவித்துள்ளனர். நடிகர் விஜய்யின் தமிழக வெற்றிக் கழகம் (TVK) களத்தில் இருந்தாலும், 18.7 சதவீத மக்கள் மட்டுமே இதனை மும்முனைப் போட்டியாகக் கருதுகின்றனர். இதனால் பிரதான இரு அணிகளுக்கும் இடையே ஆட்சியைப் பிடிப்பதில் கடும் மல்லுக்கட்டு இருக்கும் என்பது உறுதியாகியுள்ளது.
தொகுதிகளின் எண்ணிக்கையைப் பொறுத்தவரை, திமுக கூட்டணி 113 முதல் 123 இடங்களைக் கைப்பற்றி ஆட்சியைத் தக்கவைக்க வாய்ப்புள்ளதாகக் கணிக்கப்பட்டுள்ளது. அதிமுக கூட்டணி 106 முதல் 116 இடங்களைப் பிடித்து மிக நெருக்கமான சவாலை அளிக்கும் எனத் தெரிகிறது. விஜய்யின் தமிழக வெற்றிக் கழகம் 2 முதல் 8 இடங்கள் வரை பெறக்கூடும் என இந்த ஆய்வு தெரிவிக்கிறது. மொத்தத்தில், 2026 தேர்தல் முடிவு என்பது நூலிழை வித்தியாசத்தில் அமைய வாய்ப்புள்ளதால் தமிழக அரசியல் களம் சூடுபிடித்துள்ளது.