காவிரி நீர் பங்கீட்டுப் பிரச்சினையில் தமிழகத்திற்கு உரிய தண்ணீரைத் திறக்காமல் கர்நாடக அரசு தொடர்ந்து முட்டுக்கட்டை போட்டு வருகிறது. இதனால் தமிழகத்தில் குறுவை சாகுபடி கடுமையாகப் பாதிக்கப்பட்டு, விவசாயிகளின் வாழ்வாதாரம் கேள்விக்குறியாகியுள்ளது. இத்தகைய சூழலில், காவிரிக்கு குறுக்கே மேகதாது அண கட்ட கர்நாடகா தீவிர முயற்சி மேற்கொண்டு வரும் நிலையில், இப்பிரச்சினை குறித்துப் பேச கர்நாடகா செல்ல முயன்ற தமிழக முதல்வர் விஜயின் முடிவுக்குத் தமிழகத்தின் அனைத்துக் அரசியல் கட்சிகளும், விவசாய சங்கங்களும் கடும் எதிர்ப்பு தெரிவித்தன.
தமிழ்நாட்டின் அனைத்துக் தரப்பு எச்சரிக்கைகளையும் மீறி, கர்நாடக முதலமைச்சரைச் சந்தித்துப் பேச தூது அனுப்பிய நிலையில், “இப்போதைக்கு நீங்கள் வர வேண்டாம்” என கர்நாடக அரசு மறுப்பு தெரிவித்துள்ளது. காவிரி மேலாண்மை ஆணையம் தமிழகத்திற்குத் தண்ணீர் திறக்க உத்தரவிட்ட நிலையிலேயே கர்நாடகா இந்த கேட்டைச் சாத்தும் நடவடிக்கையை எடுத்துள்ளது. இதனிடையே, இது குறித்து திமுக தலைவர் மு.க.ஸ்டாலின் வெளியிட்டுள்ள அறிக்கையில், தன்னிச்சையாகச் செயல்பட நினைத்துத் தமிழக முதலமைச்சர் தற்போது அரசியல் ரீதியாகத் தனிமைப்பட்டு நிற்கிறார் எனக் கடுமையாக விமர்சித்துள்ளார்..
கர்நாடகத்தைப் பொறுத்தவரைத் தமிழ்நாட்டை வெறும் உபரிநீரை வெளியேற்றும் வடிகாலாகவே பார்க்கிறார்கள் என்பதை வரலாறு சுட்டிக்காட்டுகிறது. எனவே, தண்ணீரைத் தர மறுக்கும் ஒரு மாநிலத்துடன் பேச்சுவார்த்தை நடத்துவது பயனளிக்காது என்றும், சட்டரீதியாகப் போராடுவதே தீர்வைத் தரும் என்றும் கடந்தகால அனுபவங்கள் மூலம் அறிந்துகொள்ள வேண்டும். ஆனால், தான் நேரில் சென்றால் காவிரியைக் கையோடு கொண்டுவந்து விடலாம் என்ற தவறான கணக்கீட்டில் செயல்பட்டு, முதலமைச்சர் தமிழகத்தின் கௌரவத்தைச் சமரசம் செய்துவிட்டதாகக் குற்றச்சாட்டுகள் எழுந்துள்ளன.
தமிழக முதலமைச்சரின் வருகையை நிராகரித்த கையோடு, ஆகஸ்ட் 2-ஆம் தேதி கர்நாடகாவில் அனைத்துக் கட்சிக் கூட்டத்தைக் கூட்டி அம்மாநில அரசு தனது ஒற்றுமையை நிரூபித்துள்ளது. இந்தச் சூழலைச் சுட்டிக்காட்டியுள்ள ஸ்டாலின், இனியேனும் நாட்டின் உயிர்ப்பிரச்சினையான காவிரி விவகாரத்தைச் சரியான ஆலோசனைகளோடு அணுக வேண்டும் என்றும், தமிழ்நாட்டிலும் உடனடியாக அனைத்துக் கட்சிக் கூட்டத்தைக் கூட்ட முதலமைச்சரால் முடியுமா என்றும் கேள்வி எழுப்பியுள்ளார்.