சமீபத்தில் நடைபெற்ற சட்டமன்றத் தேர்தலில் எதிர்பாராத பின்னடைவைச் சந்தித்ததைத் தொடர்ந்து, திராவிட முன்னேற்றக் கழகத்தை அடிமட்டம் முதல் தலைமை வரை முழுமையாக மறுசீரமைக்கும் பணியில் திமுக தலைவர் மு.க.ஸ்டாலின் தீவிரமாக ஈடுபட்டுள்ளார். தேர்தல் தோல்விக்கான காரணங்களை ஆராய்ந்த சிறப்புச் சீரமைப்புக் குழு, சுமார் 20 மாவட்டச் செயலாளர்களின் பதவிகளைப் பறிக்கவும், மாவட்டச் செயலாளர்களின் கட்டுப்பாட்டில் உள்ள தொகுதிகளின் எண்ணிக்கையைக் குறைக்கவும் அதிரடிப் பரிந்துரைகளை அளித்துள்ளது. இருப்பினும், விரைவில் உள்ளாட்சித் தேர்தல்களும் இடைத்தேர்தல்களும் வரவிருப்பதால், இந்தச் சமயத்தில் கடுமையான நடவடிக்கைகள் எடுத்தால் உட்கட்சிப் பூசல் வெடிக்கும் எனக் கருதி திமுக தலைமை இறுதி முடிவை ஒத்திவைத்துள்ளது.
இந்தச் சிக்கலான சூழலில், கட்சியைக் காலத்திற்கு ஏற்ப புதுப்பிக்கவும், முடிவுகளை விரைவாக எடுக்கவும் உதயநிதி ஸ்டாலினிடம் கூடுதல் அதிகாரங்களை ஒப்படைக்க மு.க.ஸ்டாலின் திட்டமிட்டுள்ளதாக நம்பத்தகுந்த தகவல்கள் வெளியாகியுள்ளன. இளைஞர்களை அதிக அளவில் கட்சிக்குள் ஈர்க்கவும், அமைப்பை மீண்டும் பலப்படுத்தவும் உதயநிதியின் அதிரடி அணுகுமுறை உதவும் என்று கட்சியின் மூத்த தலைவர்கள் கருதுகின்றனர். இதனால், அறிவாலயத்தின் முக்கிய முடிவுகளை எடுக்கும் மையப்புள்ளியாக உதயநிதி ஸ்டாலின் உருவெடுத்து வருகிறார்.
சமீபத்தில் தஞ்சாவூர் காவிரி உரிமைப் போராட்ட பேச்சு தொடர்பான வழக்கில் கைது செய்யப்பட்டு, மாலையிலேயே ஸ்டேஷன் பிணையில் விடுவிக்கப்பட்ட உதயநிதிக்கு தொண்டர்கள் அளித்த பிரம்மாண்ட வரவேற்பு, திமுக வட்டாரத்தில் பெரும் உற்சாகத்தை ஏற்படுத்தியுள்ளது. இந்த வரவேற்பு தொடர்பான புகைப்படங்களும் வீடியோக்களும் சமூக வலைத்தளங்களில் வைரலாகி, கட்சிக்கு சாதகமான அலையை உருவாக்கியுள்ளன. அரசு மற்றும் குடும்பப் பின்னணியைத் தாண்டி, இந்தப் போராட்டமும் கைதும் அவருக்கு ஒரு தீவிரமான அரசியல்வாதிக்கான அங்கீகாரத்தையும் தொண்டர்கள் மத்தியிலான ஆதரவையும் பெற்றுத் தந்துள்ளன.
கட்சிக்குள் கிடைத்துள்ள இந்த மாஸ் பிம்பத்தைப் பயன்படுத்தி, உதயநிதி ஸ்டாலினை கட்சியின் மிக முக்கிய அதிகாரப் பொறுப்பில் அமர்த்த திமுக தலைமை திட்டமிட்டு வருகிறது. எதிர்காலத் தேர்தல்களை வலுவாக எதிர்கொள்ளவும், திமுகவை மீண்டும் வெற்றிப் பாதைக்கு அழைத்துச் செல்லவும் உதயநிதிக்கு அளிக்கப்படும் இந்த புதிய அதிகாரம் முக்கிய காரணியாக இருக்கும் என்று எதிர்பார்க்கப்படுகிறது.