எலான் மாஸ்கின் ஸ்பேஸ் எக்ஸ் நிறுவனத்துக்குச் சொந்தமான பால்கன் 9 ராக்கெட்டின் மேல் பகுதி, மணிக்கு சுமார் 8,690 கி.மீ அதிவேகத்தில் நிலவின் மேற்பரப்பில் மோதி விபத்துக்குள்ளான காணொளி சமூக ஊடகங்களில் வைரலாகி வருகிறது. கடந்த 2025-ஆம் ஆண்டு ஜனவரி மாதம் நிலவு ஆய்வு விண்கலங்களை ஏந்திச் சென்ற இந்த ராக்கெட்டின் இரண்டாம் பகுதி, தன் பணியை முடித்த பிறகு விண்வெளியில் கட்டுப்பாடின்றி சுற்றி வந்தது. பின்னர் சூரியனின் ஈர்ப்பு விசை போன்ற இயற்கை காரணிகளால் இதன் பாதை மாறி, நிலவை நோக்கி நகர்ந்து இறுதியாக மோதியுள்ளது.
சுமார் 4,000 கிலோ எடையுள்ள இந்த ராக்கெட் பாகம், நிலவின் வடமேற்குப் பகுதியில் அமைந்துள்ள ‘ஐன்ஸ்டீன் பள்ளம்’ அருகே பலமாக மோதியது. சுமார் 3 டன் டி.என்.டி வெடிபொருளுக்குச் சமமான ஆற்றலுடன் ஏற்பட்ட இந்த மோதலால், நிலவின் மேற்பரப்பில் 20 முதல் 30 மீட்டர் அகலமுள்ள புதிய பள்ளம் உருவாகியுள்ளது. மேலும், இந்த மோதலின் பலத்த தாக்கத்தால் நிலவிலிருந்து பெருமளவிலான தூசிகளும் பாறைத் துகள்களும் விண்வெளியில் சிதறியுள்ளன.
இந்த மோதல் சம்பவத்தால் பூமிக்கு எந்தவித ஆபத்தும் இல்லை என்று நாசா தெளிவுபடுத்தியுள்ளது. அதேவேளையில், மனிதனால் உருவாக்கப்பட்ட செயற்கை விண்வெளிப் பொருட்கள் நிலவில் மோதும்போது ஏற்படும் புவியியல் மாற்றங்களை விரிவாக ஆய்வு செய்ய இது விஞ்ஞானிகளுக்கு ஒரு அரிய வாய்ப்பாக அமைந்துள்ளது. தற்போது நாசாவின் ‘லூனார் ரீகானைசன்ஸ் ஆர்பிட்டர்’ செயற்கைக்கோள் மூலம் இந்த புதிய பள்ளமும், நிலவின் மேற்பரப்பில் ஏற்பட்ட மாற்றங்களும் தொடர்ந்து தீவிரமாகக் கண்காணிக்கப்பட்டு வருகின்றன.