தமிழக சட்டசபை தேர்தலில் தர்மபுரி தொகுதியில் போட்டியிடும் பா.ம.க. வேட்பாளர் சவுமியா அன்புமணி, தனது வேட்புமனுவுடன் சொத்து விவரங்களைத் தாக்கல் செய்துள்ளார். அதன்படி, அவரிடம் ரூ. 2.25 லட்சம், அவரது கணவர் அன்புமணி ராமதாஸிடம் ரூ. 60,000 மற்றும் மகள் சஞ்சுத்ராவிடம் ரூ. 20,000 ரொக்கம் உள்ளது. வாகனங்களைப் பொறுத்தவரை, சவுமியா பெயரில் ரூ. 9.47 லட்சம் மதிப்பிலான ஹோண்டா ஜாஸ் மற்றும் ரூ. 53.59 லட்சம் மதிப்பிலான மெர்சிடிஸ் பென்ஸ் சொகுசு கார்கள் உள்ளன.
அவருடைய ஆபரணச் சொத்துக்கள் மலைக்க வைக்கும் வகையில் உள்ளன; சவுமியாவிடம் 2,927 கிராம் தங்க நகைகள், ரூ. 1.64 கோடி மதிப்பிலான வைரம் மற்றும் 26.44 கிலோ வெள்ளிப் பொருட்கள் உள்ளன. அவரது கணவர் அன்புமணியிடம் 960 கிராம் தங்கமும், மகள் சஞ்சுத்ராவிடம் 551 கிராம் தங்கம், ரூ. 4.34 லட்சம் மதிப்பிலான வைரம் மற்றும் 2.50 கிலோ வெள்ளியும் உள்ளன. சவுமியாவின் மொத்த அசையும் சொத்துக்களின் மதிப்பு ரூ. 19.61 கோடியாக உள்ளது.
அசையா சொத்துக்களைப் பொறுத்தவரை, வேளாண் நிலங்கள் மற்றும் வணிகக் கட்டடங்கள் என ரூ. 48.85 கோடி மதிப்பிலான சொத்துக்கள் அவருக்கு உள்ளன. இதில் அன்புமணி ராமதாஸின் பங்கு ரூ. 6.85 லட்சம் மட்டுமே. மொத்தமாக சவுமியா அன்புமணியின் சொத்து மதிப்பு ரூ. 68.46 கோடி எனத் தெரிவிக்கப்பட்டுள்ளது. கடந்த 2024 மக்களவைத் தேர்தலின் போது இவரது சொத்து மதிப்பு ரூ. 61.42 கோடியாக இருந்த நிலையில், தற்போது அது உயர்ந்துள்ளது குறிப்பிடத்தக்கது. மேலும், அவருக்கு ரூ. 8.99 கோடி கடனும், ஒரு குற்றவியல் வழக்கும் நிலுவையில் உள்ளது.