சௌமியா அன்புமணியை எதிர்த்து நிக்க சொன்னாங்க… அதனாலதான் அந்த முடிவெடுத்தேன்… ஒரே போடாய் போட்ட வேல்முருகன்…!

தமிழக வாழ்வுரிமை கட்சித் தலைவர் வேல்முருகன், வரவிருக்கும் தேர்தலில் தி.மு.க கூட்டணியில் இருந்து விலகி தனித்துப் போட்டியிடப் போவதாக அதிரடியாக அறிவித்துள்ளார். நெய்வேலி தொகுதியில் போட்டியிட அவர் திட்டமிட்டிருந்த நிலையில், அங்கு ‘சீட்’ மறுக்கப்பட்டதால் இந்த முடிவு எடுக்கப்பட்டுள்ளது. பண்ருட்டியில் நடைபெற்ற வேட்பாளர் அறிமுகக் கூட்டத்தில் பேசிய அவர், தி.மு.க அரசு தனது பெயரையும் படத்தையும் அரசு விழாக்களில் புறக்கணித்ததாகவும், தி.மு.க-வின் இரண்டாம் கட்டத் தலைவர்கள் தன்னை அவமதிக்கும் வகையில் நடந்து கொண்டதாகவும் பகிரங்கமாகக் குற்றம் சாட்டினார்.

கூட்டணியில் ஏற்பட்ட விரிசல் குறித்துப் பேசிய வேல்முருகன், தி.மு.க தன்னை பா.ம.க வேட்பாளர் சவுமியா அன்புமணியை எதிர்த்துப் போட்டியிடுமாறு வற்புறுத்தியதாகவும், ஆனால் தான் அதற்கு உடன்படவில்லை என்றும் தெரிவித்தார். வன்னியர் மற்றும் பறையர் சமூகத்தினரை ஒன்றிணைக்கத் தானும் திருமாவளவனும் எடுக்கும் முயற்சிகளுக்கு இடையே, தான் போட்டியிட்ட தொகுதியை வி.சி.க-வுக்கு ஒதுக்கி இரு கட்சிகளுக்கும் இடையே மோதலை உருவாக்க தி.மு.க முயல்வதாக அவர் ஆதங்கம் தெரிவித்தார். தனது கோரிக்கைகளுக்கு அரசு செவிசாய்க்காததால், இனி ஒரு சீட்டிற்காக மற்றவர்களிடம் கையேந்தப் போவதில்லை என அவர் உறுதிபடக் கூறினார்.

தமிழக வாழ்வுரிமை கட்சி தற்போது 40 சிறிய கட்சிகளுடன் கூட்டணி அமைத்து, தமிழகம் முழுவதும் உள்ள 234 தொகுதிகளிலும் தனித்துப் போட்டியிடத் தயாராகி வருகிறது. பண்ருட்டி தொகுதிக்கான வேட்பாளர் குறித்து நிர்வாகிகளுடன் கலந்தாய்வு செய்து அடுத்த 24 மணி நேரத்திற்குள் அறிவிக்கப்படும் என்றும், தான் தமிழகம் முழுவதும் சுற்றுப்பயணம் மேற்கொண்டு தீவிரப் பிரசாரம் செய்யப் போவதாகவும் வேல்முருகன் அறிவித்தார். தேர்தல் ஆணையம் ஒதுக்கிய ‘கேமரா’ சின்னத்தில் தங்கள் கட்சி வேட்பாளர்கள் களம் காண்பார்கள் என அவர் குறிப்பிட்டார்.

இந்தத் தேர்தலில் மற்ற கட்சிகளை விடக் குறைவான செலவிலேயே (சுமார் 4 லட்சம் ரூபாய்) தங்கள் வேட்பாளர்கள் போட்டியிடுவார்கள் என்றும், மீதமுள்ள பணிகளைத் தொண்டர்களே களத்தில் நின்று கவனித்துக் கொள்வார்கள் என்றும் அவர் பேசினார். மேலும், தற்போது அரசியல் களத்தில் அதிகம் பேசப்படும் தமிழக வெற்றிக் கழகத்தின் (TVK) தாக்கம் இந்தத் தேர்தலோடு முடிந்துவிடும் என்றும், அடுத்த தேர்தலில் ‘நம்ம டி.வி.கே’ (தமிழக வாழ்வுரிமை கட்சி) தான் பிரதான பேசுபொருளாக மாறும் என்றும் அவர் நம்பிக்கை தெரிவித்தார்.