கோவை மாவட்டம் அன்னூர் அருகே சொத்து தகராறு காரணமாக மகனே தந்தையை நடுரோட்டில் கல்லை போட்டு கொடூரமாக கொலை செய்த சம்பவம் பெரும் அதிர்ச்சியை ஏற்படுத்தியுள்ளது. ஒன்னக்கரசம் பாளையத்தைச் சேர்ந்த விஸ்வநாதன் (61) என்பவருக்கும், அவரது மகன் ராஜசேகர் என்பவருக்கும் இடையே நீண்ட நாட்களாக சொத்து தொடர்பாக முன்விரோதம் இருந்து வந்துள்ளது. கடந்த 2017-ஆம் ஆண்டு தந்தையிடமிருந்து வீட்டைத் தனது பெயருக்கு மாற்றிக்கொண்ட ராஜசேகர், அதன்பின்னர் தந்தையைச் சரியாகக் கவனிக்காமல் வீட்டை விட்டு வெளியேறுமாறு வற்புறுத்தி வந்ததாகக் கூறப்படுகிறது.
இதனால் மனமுடைந்த விஸ்வநாதன், தனது சொத்தை மீண்டும் மீட்க வருவாய் கோட்டாட்சியரிடம் முறையிட்டதுடன், இது தொடர்பாக சென்னை உயர்நீதிமன்றத்திலும் வழக்கு தொடர்ந்துள்ளார். இந்த சட்டப் போராட்டத்தினால் ஆத்திரமடைந்த ராஜசேகர், தனது தந்தையுடன் அடிக்கடி வாக்குவாதத்தில் ஈடுபட்டு வந்துள்ளார். இந்நிலையில், சம்பவத்தன்று ஒன்னக்கரசம் பாளையத்தில் இருவருக்கும் இடையே மீண்டும் தகராறு ஏற்பட்டுள்ளது.
வாக்குவாதம் முற்றிய நிலையில், ஆத்திரத்தின் உச்சக்கட்டத்திற்குச் சென்ற ராஜசேகர், தனது தந்தை என்றும் பாராமல் விஸ்வநாதனை கீழே தள்ளி, அங்கிருந்த பெரிய கல்லை எடுத்து அவர் தலையில் போட்டு கொடூரமாகக் கொலை செய்தார். பொதுவெளியில் நடுரோட்டில் நடந்த இந்த வெறிச்செயலைத் தொடர்ந்து, ராஜசேகர் அங்கிருந்து தப்பி ஓடிவிட்டார். இச்சம்பவம் குறித்து தகவல் அறிந்த அன்னூர் போலீசார் விரைந்து வந்து விஸ்வநாதனின் உடலைக் கைப்பற்றி பிரேதப் பரிசோதனைக்காக அனுப்பி வைத்தனர்.
தற்போது இக்கொலை தொடர்பான சிசிடிவி காட்சிகள் வெளியாகி அப்பகுதியில் பெரும் பரபரப்பை ஏற்படுத்தியுள்ளது. தப்பியோடிய ராஜசேகரை பிடிக்க அன்னூர் போலீசார் தனிப்படை அமைத்துத் தீவிரமாகத் தேடி வருகின்றனர். பெற்ற மகனே சொத்துக்காகத் தந்தையைத் துடிக்கத் துடிக்கக் கொலை செய்த இந்தச் சம்பவம் மனிதநேயமற்ற செயலாகக் கருதி அப்பகுதி மக்களிடையே பெரும் சோகத்தையும் ஆத்திரத்தையும் ஏற்படுத்தியுள்ளது.