அந்த விஷயத்துல அவர அடிச்சுக்க ஆளே இல்ல… நடுராத்திரியில் போன் பண்ணி சினேகனைப் மனம் குளிரவைத்த SPB!

இந்திய சினிமாவில் அதிக பாடல்களை பாடிய ஆண் பாடகர் என்ற பெருமைக்குரியவர் எஸ் பி பாலசுப்ரமணியன்.  இவர் 40,000க்கும் மேற்பட்ட பாடல்களை பாடியுள்ளார்.ஆந்திராவைப் பூர்வீகமாகக் கொண்ட எஸ் பி பி சென்னையில் படிக்கும்போது பாடல்கள் பாடுவதில் ஆர்வம கொண்டு அதற்கான வாய்ப்புகளை தேடி வந்தார். அவருக்கு முதலில் பாட வாய்ப்புக் கிடைத்தது தெலுங்கு சினிமாவில்தான்.

1966-ம் ஆண்டு தெலுங்கில் வெளியான ஸ்ரீ ஸ்ரீ ஸ்ரீ மரியாதை ராமண்ணா என்ற படத்தின் மூலம் பாடகராக அறிமுகமான எஸ்.பி.பி 1969-ம் ஆண்டு தமிழில் ஹோட்டல் ரம்பா என்ற படத்தின் மூலம் அறிமுகமானார். ஆனால் இந்த படம் கைவிடப்பட்டது. அதனைத் தொடர்ந்து தமிழில், சாந்தி நிலையம் என்ற படத்தில் இடம்பெற்ற இயற்கை என்னும் இளையகன்னி என்ற பாடல் மூலம் மீண்டும் தமிழ் சினிமாவில் பாடகராக அறிமுகமானார்.

எம் ஜி ஆருக்காக ஆயிரம் நிலவே வா பாடலை பாடிய பின்னர் கவனிக்கப்படும் பாடகர் ஆனார். ஆனால் அவர் உச்சத்துக்கு சென்றது இளையராஜாவின் வருகைக்குப் பிறகுதான். இளையராஜா இசையில் அதிக பாடல்களை பாடிய பாடகர் என்றால் அது எஸ் பி பிதான். சில ஆண்டுகளுக்கு முன்னர் கொரோனா தொற்றால் பாதிக்கப்பட்டு அவர் உயிரிழந்தார். அது இன்னமும் தமிழ் சினிமா ரசிகர்களால் ஏற்றுக்கொள்ள முடியாத ஒரு மரணமாக இருக்கிறது.

அவரைப் பற்றி அவருடன் பணியாற்றிய கலைஞர்கள் சொல்லும் வார்த்தைகள் எல்லாம் எப்பேர்ப்பட்ட மனிதர் அவர் என்ற எண்ணத்தை ஏற்படுத்துகின்றன. அந்த வகையில் பாடல் ஆசிரியர் சினேகன் எஸ் பிபியின் பாராட்டும் குணத்தைப் பற்றி சிலாகித்து ஒரு சம்பவத்தைப் பேசியுள்ளார். அதில் “ஒரு நாள் நள்ளிரவில் எனக்கு போன் பண்ணி பேசினார் SPB ஐயா. அப்போது என்னிடம் ‘நான் ஒரு நிகழ்ச்சிக்கு போயிருந்தேன் சினேகன். அந்த நிகழ்ச்சியில் நீங்கள் எழுதிய ஒரு பாடலை ஒருவர் பாடினார். அதைக் கேட்ட எல்லோருமே கண் கலங்கி விட்டார்கள். நானும் கூட. எனக்கும் என் அம்மாவின் நினைவு வந்துவிட்டது. நிகழ்ச்சி முடிந்து வீட்டுக்கு வந்ததும் உங்களை உடனே அழைத்துப் பாராட்ட வேண்டும் என்று தோன்றியது. அதுதான் நள்ளிரவு என்றாலும் பராவியில்லை என்று அழைத்தேன்’ என சொன்னார்.

அந்த பாடல் ராம் படத்தில் நான் எழுதிய “ஆரோரிரோ நான் இங்கு பாட… தாயே நீ கண்ணுறங்கு என்ற பாடல்…” யேசுதாஸ் பாடியது. நான் எழுதிய பாடல்களில் 50க்கும் மேல் SPB ஐயா பாடியிருப்பார். ஆனால் அவர் பாடாத ஒரு பாடலை சிலாகித்துப் பேசுகிறார் என்றால் அவர் எவ்வளவு உன்னதக் கலைஞனாக இருப்பார் என்று பாருங்கள்” எனப் பேசியுள்ளார்.