சினிமா, இசை என பன்முகத்திறமை கொண்ட கலைஞர் ஸ்ருதி ஹாசன், சமீபத்திய பேட்டி ஒன்றில் தனது ஆன்மீகத் தேடல் குறித்துப் பகிர்ந்துள்ள கருத்துக்கள் ரசிகர்களிடையே நெகிழ்ச்சியை ஏற்படுத்தியுள்ளன. உலகநாயகன் கமல்ஹாசனின் மகளாக அறிமுகமானாலும், ‘ஏழாம் அறிவு’, ‘3’ போன்ற படங்கள் மூலம் தனக்கென தனி அடையாளத்தை உருவாக்கிக் கொண்டவர் அவர். நடிப்பைத் தாண்டி இசையில் அதிக ஆர்வம் கொண்ட ஸ்ருதி, சமீபத்தில் வெளியான ‘பவழ மல்லி’ பாடல் வரை தனது கலைப் பயணத்தைத் தொய்வின்றித் தொடர்ந்து வருகிறார்.
தன்னுடைய தனிப்பட்ட வாழ்க்கை மற்றும் வெளிப்படையான பேச்சுக்களால் அவ்வப்போது சர்ச்சைகளில் சிக்கினாலும், எதற்கும் அஞ்சாமல் தனது பாதையில் முன்னேறி வருகிறார். குறிப்பாக, சமீபத்தில் ஒரு நிகழ்ச்சியில் தன்னை ‘அம்மா’ என்று அழைத்த நபரிடம் அவர் காட்டிய ரியாக்ஷன் சமூக வலைதளங்களில் வைரலானது. எதார்த்தமான குணமும், மனதில் பட்டதை மறைக்காமல் பேசும் சுபாவமும் ஸ்ருதி ஹாசனை மற்ற நடிகைகளிடம் இருந்து தனித்துக் காட்டுகிறது.
தற்போது இயக்குநர் மிஷ்கின் இயக்கத்தில் விஜய் சேதுபதியுடன் இணைந்து ‘ட்ரெய்ன்’ திரைப்படத்தில் நடித்து வரும் அவர், முதன்முறையாகத் தனது ஆன்மீக அனுபவம் குறித்து உருக்கமாகப் பேசியுள்ளார். “நாம் மட்டும் கடவுளைத் தேர்ந்தெடுப்பதில்லை, கடவுளும் நம்மைத் தேர்ந்தெடுக்கிறார்கள்” என்று குறிப்பிட்டுள்ள அவர், தனது வாழ்வில் வாராஹி அம்மனின் வருகை ஒரு பெரிய மாற்றத்தை ஏற்படுத்தியதாகத் தெரிவித்துள்ளார். நவீனச் சிந்தனை கொண்டவராக இருந்தாலும், இந்த ஆன்மீகப் பிணைப்பு தனக்கு மிகுந்த மன அமைதியைத் தந்துள்ளதாக அவர் கூறியுள்ளார்.
தன்னுடைய நண்பர் ஒருவரின் அழைப்பின் பேரில் வாராஹி அம்மன் கோயிலுக்குச் சென்ற அனுபவத்தைப் பகிர்ந்த ஸ்ருதி ஹாசன், “ஆடம்பரமோ, விஐபி வரிசையோ, நன்கொடை கட்டாயமோ இல்லாத அந்தச் சிறிய கோயிலில் உண்மையான பக்தியை உணர்ந்தேன்” என்று நெகிழ்ந்துள்ளார். வாராஹி அம்மன் மிகவும் சக்திவாய்ந்த தெய்வம் என்பதைத் தான் மனதார நம்புவதாகவும், அந்தச் சந்திப்பு தனது வாழ்க்கையில் ஒரு திருப்புமுனையாக அமைந்ததாகவும் அவர் எமோஷனலாகத் தெரிவித்துள்ளார்.