கள்ளக்குறிச்சி மாவட்டம் வடதுரைசலூர் பகுதியில் பேக்கரி மற்றும் டீக்கடை நடத்தி வருபவர் பிரகாஷ். இவரது கடைக்கு அதே பகுதியைச் சேர்ந்த சதீஷ் மற்றும் அவரது நண்பர்கள் டீ குடிக்கச் சென்றபோது, முதலில் பணத்தைக் கொடுத்துவிட்டு டீ வாங்குமாறு உரிமையாளர் கண்டிப்புடன் கூறியுள்ளார். தாங்கள் உள்ளூர்க்காரர்கள் தான் என்றும், குடித்துவிட்டு பணம் தருவதாகவும் அந்த இளைஞர்கள் கூறியுள்ளனர். அதனைத் தொடர்ந்து அவர்கள் தண்ணீர் பாட்டில் ஒன்றைக் கேட்டபோது, அவர்களைச் சீண்டும் நோக்கத்துடன் பிரகாஷ் அதிக விலை கூறியதால் இரு தரப்பினருக்கும் இடையே கடும் வாக்குவாதம் உருவானது.
இந்த வாக்குவாதம் சிறிது நேரத்திலேயே முற்றிப்போய் கைகலப்பாக மாறியது. அப்போது ஆத்திரமடைந்த கடை உரிமையாளர் பிரகாஷ், கொதிக்கும் சூடான டீயை சதீஷின் நண்பர் மீது கோபமாக ஊற்றியுள்ளார். இதனால் நிலைமை கைமீறிப்போய் இரு தரப்பினரும் ஒருவரையொருவர் கடுமையாகத் தாக்கிக் கொண்டனர். இதைப் பார்த்த அக்கம் பக்கத்தினர் மற்றும் பொதுமக்கள் உடனடியாகத் தலையிட்டு சண்டையைத் தடுத்து நிறுத்தி இருவரையும் அங்கிருந்து அனுப்பி வைத்தனர். டீக்கடையில் நடந்த இந்த எதிர்பாராத மோதல் சம்பவம் அந்தப் பகுதியில் பெரும் பரபரப்பை ஏற்படுத்தியுள்ளது.