“சிறுவனின் உடலில் இருந்த காயங்கள்.. இது இயற்கை மரணம் இல்லை.. கொடூரக் கொலை”.. 4 வயது சிறுவன் மர்ம மரணத்தின் பின்னணியில் இருக்கும் திடுக்கிடும் உண்மைகள்..!!

மகாராஷ்டிர மாநிலம் தானே மாவட்டத்தில், நான்கு வயது சிறுவன் ஒருவன் மர்மமான முறையில் உயிரிழந்த சம்பவம் பெரும் பரபரப்பை ஏற்படுத்திய நிலையில், அது திட்டமிட்ட கொலை என்பது போலீசாரின் அதிரடி விசாரணையில் அம்பலமாகியுள்ளது. உயிரிழந்த சிறுவனின் தாய், தன் கணவரைப் பிரிந்து சம்பு சர்மா என்பவருடன் குடும்பம் நடத்தி வந்துள்ளார். இந்தச் சூழ்நிலையில், திடீரென உயிரிழந்த அந்தச் சிறுவனின் உடலில் ஆங்காங்கே காயங்கள் இருந்ததும், அவனது உடலை எவ்விதத் தகவலும் இன்றி அவசர அவசரமாக அடக்கம் செய்ய முயற்சிகள் நடந்ததும் அப்பகுதி மக்களிடையே பெரும் சந்தேகத்தை ஏற்படுத்தியது.

இதுகுறித்துத் தகவல் அறிந்து சம்பவ இடத்திற்கு விரைந்து சென்ற போலீசார், சிறுவனின் உடலைக் கைப்பற்றிப் பிரேத பரிசோதனைக்காக அனுப்பி வைத்தனர். பிரேத பரிசோதனை அறிக்கையின் முடிவில், சிறுவனின் உடலில் பல்வேறு இடங்களில் கடுமையான உள்காயங்கள் இருப்பது கண்டறியப்பட்டது. உடற்கூறாய்வு முடிவுகள் சிறுவன் அடித்துக் கொல்லப்பட்டதை உறுதி செய்ததையடுத்து, சந்தேகத்தின் பேரில் அந்தத் தாயின் கள்ளக்காதலனான சம்பு சர்மாவைப் பிடித்து போலீசார் தங்களின் பாணியில் தீவிர விசாரணை நடத்தினர்.

போலீசாரின் முடுக்கிவிடப்பட்ட விசாரணையில், தான் தான் அந்த நான்கு வயதுச் சிறுவனை அடித்துக் கொலை செய்தேன் என்ற அதிர்ச்சி உண்மையைச் சம்பு சர்மா ஒப்புக்கொண்டார். இதையடுத்து, அவர் மீது கொலை வழக்குப் பதிவு செய்த போலீசார் அவரை உடனடியாகக் கைது செய்து சிறையிலடைத்தனர். இந்த கொடூரக் கொலைக்கான அசல் காரணம் என்ன என்பது குறித்தும், தன் சொந்தப் பிள்ளையின் கொலையில் தாய்க்கும் ஏதேனும் தொடர்பு உள்ளதா என்பது குறித்தும் போலீசார் தற்பொழுது பல கோணங்களில் தீவிர விசாரணை மேற்கொண்டு வருகின்றனர்.