மும்பை மலாடு பகுதியில் மூடிக்கிடந்த ஒரு கிளினிக்கில் இருந்து கடுமையான துர்நாற்றம் வீசியதை அடுத்து, அக்கம் பக்கத்தினர் காவல் துறைக்கு தகவல் அளித்தனர். சம்பவ இடத்திற்கு வந்த காவல்துறையினர், மூடியிருந்த இரும்புக் கதவைத் திறந்து உள்ளே சென்று பார்த்தபோது, அங்குள்ள ஒரு குளிர்சாதன அறையில் முதியவர் ஒருவரின் சடலம் இருப்பதைக் கண்டுபிடித்தனர்.
காவல்துறையினரின் விசாரணையில், மீட்கப்பட்ட உடல் கடந்த 2022-ஆம் ஆண்டு மாரடைப்பால் உயிரிழந்த 80 வயது முதியவருடையது என்பது தெரியவந்தது. தந்தையின் மீது கொண்ட அதீத பாசத்தின் காரணமாக, அவரது உடலைத் தகனம் செய்யாமல் தனியார் கிளினிக் உதவியுடன் அவரது மகளும் மனைவியும் பாதுகாத்து வந்துள்ளனர். இறந்த உடல்களை மிகக் குறைந்த வெப்பநிலையில் பாதுகாக்கும் ‘கிரையோனிக்ஸ்’ தொழில்நுட்பம் மூலம் அந்த உடலை அமெரிக்காவிற்கு அனுப்ப அவர்கள் திட்டமிட்டு, அதற்கான சட்ட ஆலோசனைகளையும் அமெரிக்க நிறுவனங்களிடம் பெற்று வந்துள்ளனர்.
சமீபத்தில் ஒரு மாதமாக இந்த கிளினிக் சீரமைப்பு பணிகளுக்காக மூடப்பட்டிருந்த நிலையில்தான், பராமரிப்பு இல்லாததால் உடலிலிருந்து துர்நாற்றம் வீசத் தொடங்கியுள்ளது. கிளினிக் உரிமையாளருக்கோ அல்லது உள்ளூர் காவல் நிலையத்திற்கோ சடலம் அங்கு வைக்கப்பட்டிருப்பது குறித்து எந்தவொரு தகவலும் முன்னதாகத் தெரிவிக்கப்படவில்லை. இருப்பினும், முதியவர் இயற்கையாகவே மரணமடைந்ததற்கான அதிகாரப்பூர்வ சான்றிதழை அவரது குடும்பத்தினர் சமர்ப்பித்ததால், காவல்துறையினர் இந்த விவகாரத்தில் எந்த வழக்கும் பதிவு செய்யவில்லை.