பெங்களூரு சிக்கபானவரா குட்டே பசவேஸ்வர நகர் பகுதியில், 34 வயதான அபினந்தன் மற்றும் அவரது 4 வயது மகன் யதுவீர் ஆகிய இருவர் வீட்டில் உயிரிழந்த நிலையில் கண்டெடுக்கப்பட்டனர். திங்கள்கிழமை அதிகாலை நடந்த இச்சம்பவம் குறித்து அபினந்தனின் தாயார் அளித்த புகாரின் பேரில் காவல்துறையினர் வழக்குப் பதிவு செய்து தீவிர விசாரணை நடத்தினர். கணவன்-மனைவி இடையே ஏற்பட்ட தகராறில், மனைவி ஹரிணி சமையலறை கரண்டியால் அபினந்தனைத் தாக்கியதாகத் தெரியவந்துள்ளது.
அதன்பின்னர் ஹரிணி தனக்கு நெருக்கமான வினய் என்பவரை வீட்டிற்கு வரவழைத்து, அவருடன் இணைந்து அபினந்தனைத் தாக்கிப் படுகொலை செய்ததாகப் போலீசார் சந்தேகிக்கின்றனர். அப்போது தூக்கத்திலிருந்து எழுந்த 4 வயது குழந்தை யதுவீரையும் மூச்சுத்திணறடித்துக் கொன்றுவிட்டு, ரத்தக் கறைகளைச் சுத்தம் செய்து, சிசிடிவி கேமராக்களைச் செயலிழக்கச் செய்ததாகக் கூறப்படுகிறது. தலைமறைவாக உள்ள முக்கியச் சந்தேக நபரான வினயைப் பிடிக்கப் போலீசார் தீவிரத் தேடுதல் வேட்டை நடத்தி வருகின்றனர்.