இந்திய கம்யூனிஸ்ட் கட்சியின் முன்னாள் மூத்த தலைவரான சி.மகேந்திரன், அக்கட்சியில் இருந்து விலகி நடிகர் விஜய் தலைமையிலான தமிழக வெற்றிக் கழகத்தில் (தவெக) இணைந்துள்ளார். இவரது இந்த அரசியல் மாற்றம் தமிழக அரசியலில் விவாதங்களை ஏற்படுத்தியுள்ள நிலையில், இது தொடர்பாக இந்திய கம்யூனிஸ்ட் கட்சியின் மாநிலச் செயலாளர் வீரபாண்டியன் அதிகாரப்பூர்வ அறிக்கை ஒன்றை வெளியிட்டு விளக்கமளித்துள்ளார்.
அவர் வெளியிட்டுள்ள அறிக்கையில், சி.மகேந்திரன் ஏற்கனவே இந்திய கம்யூனிஸ்ட் கட்சியின் ஒழுங்கு நடவடிக்கைக்கு உள்ளாக்கப்பட்டவர் என்று தெரிவித்துள்ளார். மோசடி பேர்வழிகளுக்கு ஆதரவாகச் செயல்பட்ட காரணத்தினாலேயே அவர் மீது இந்த ஒழுங்கு நடவடிக்கை எடுக்கப்பட்டது என்றும், கடந்த சில காலமாகவே அவர் கட்சியுடன் எந்தவிதமான தொடர்பும் இல்லாமலேயே இருந்து வந்தார் என்றும் வீரபாண்டியன் அந்த அறிக்கையில் திட்டவட்டமாகக் குறிப்பிட்டுள்ளார்.