மகாராஷ்டிர மாநிலம் வாஷிம் மாவட்டத்தில், 7 மாத கர்ப்பிணியான தனது மனைவி தீபாலியைக் கொலை செய்த குற்றச்சாட்டின் கீழ், இந்திய ராணுவத்தில் பணிபுரியும் 28 வயதான ஞானேஷ்வர் மத்னே என்பவரை காவல்துறையினர் கைது செய்துள்ளனர். மனைவி வீட்டில் வழுக்கி விழுந்துவிட்டதாகக் கூறி, இந்த மரணத்தை ஒரு விபத்து போலச் சித்தரிக்க அவர் முயற்சித்துள்ளார். ஆனால், பெண்ணைப் பரிசோதித்த அரசு மருத்துவர்கள் அவரது கழுத்தில் நெரிக்கப்பட்டதற்கான காயங்கள் இருப்பதை உறுதி செய்ததை அடுத்து, உடனடியாகக் காவல்துறையினருக்குத் தகவல் தெரிவிக்கப்பட்டது.
இந்தச் சம்பவம் குறித்து தீபாலியின் சகோதரர் ராகுல் அளித்த புகாரின் பேரில் வழக்கின் திசை முழுமையாக மாறியுள்ளது. ஞானேஷ்வருக்கு வேறு ஒரு பெண்ணுடன் தகாத உறவு இருந்ததாகவும், அதற்காகத் தனது சகோதரியை அவரும் அவரது குடும்பத்தினரும் தொடர்ந்து சித்திரவதை செய்து வந்ததாகவும் ராகுல் தனது புகாரில் குற்றம் சாட்டியுள்ளார். இதற்கிடையே கணவன்-மனைவி இருவருக்கும் இடையே அடிக்கடி வாக்குவாதங்கள் நடந்துள்ளதும் விசாரணையில் தெரியவந்துள்ளது. இந்தப் புகாரின் அடிப்படையில், ராணுவ வீரர் மற்றும் அவரது பெற்றோர் மீது கொலை வழக்குப் பதிவு செய்த போலீசார், ஞானேஷ்வரை உடனடியாகக் கைது செய்தனர்.
தற்போது, இந்த மரணம் திட்டமிட்ட கொலையா அல்லது இதில் வேறு யாருக்காவது தொடர்பு உள்ளதா என்ற கோணத்தில் காவல்துறை விசாரணை தீவிரமடைந்துள்ளது. குற்றச்சம்பவம் நடந்த இடம், மருத்துவமனைக்குக் கொண்டு செல்லப்பட்ட சூழ்நிலை, மற்றும் குடும்பத்தினரிடம் முன்னுக்குப் பின் முரணாகக் கூறப்பட்ட தகவல்கள் ஆகியவற்றை போலீசார் விரிவாக ஆராய்ந்து வருகின்றனர். உடற்கூறாய்வு மற்றும் தடயவியல் துறை அறிக்கைகள் இந்த வழக்கில் முக்கிய திருப்பத்தை ஏற்படுத்தும் என எதிர்பார்க்கப்படும் நிலையில், நிறைமாத கர்ப்பிணி உயிரிழந்த சம்பவம் அப்பகுதியில் பெரும் அதிர்ச்சியையும் சோகத்தையும் ஏற்படுத்தியுள்ளது.