“டெல்லி வந்தாலும் சரி, குஜராத் வந்தாலும் சரி”… உங்க பருப்பு இங்க வேகாது…. திமுக தொண்டர்களுக்கு செந்தில் பாலாஜி போட்ட ‘பவர்ஃபுல்’ கட்டளை….!

தமிழகச் சட்டமன்றத் தேர்தல் நெருங்கி வரும் வேளையில், கோவை மாவட்டத்தை திமுகவின் கோட்டையாக மாற்றும் நோக்கில் முன்னாள் அமைச்சர் செந்தில் பாலாஜி தீவிர தேர்தல் பணிகளை மேற்கொண்டு வருகிறார். மேட்டுப்பாளையம் சட்டமன்றத் தொகுதிக்கான திமுக தேர்தல் அலுவலகத்தைத் திறந்து வைத்துப் பேசிய அவர், வரும் தேர்தலில் திமுகவின் வெற்றியை எவராலும் தடுக்க முடியாது என நம்பிக்கையுடன் தெரிவித்தார்.

கொங்கு மண்டலத்தில் கடந்த காலங்களில் அதிமுக வலுவாக இருந்தபோதிலும், இந்த முறை 10 தொகுதிகளிலும் திமுகவே வெற்றி பெறும் என்று செந்தில் பாலாஜி உறுதிபடக் கூறினார். டெல்லி, குஜராத் என எங்கிருந்து எதிர்ப்புகள் வந்தாலும், கோவையில் அவர்களின் அரசியல் கணக்குகள் பலிக்காது என்றும், இங்கு “பருப்பு வேகாது” என்றும் அவர் அதிரடியாகக் குறிப்பிட்டார். மத்தியில் ஆளும் சக்திகளோ அல்லது வெளிமாநிலத் தலைவர்களோ களம் இறங்கினாலும் திமுகவின் வெற்றியைப் பாதிக்காது என்பதே அவரின் கருத்தாக இருந்தது.

நிர்வாகிகளுக்கு அறிவுரை வழங்கிய அவர், கடந்த தேர்தல்களில் மற்ற கட்சிகள் பெற்ற வாக்கு விபரங்களைச் சரியாக ஆய்வு செய்து, அதற்கேற்ப வியூகங்களை வகுக்க வேண்டும் என்று கேட்டுக்கொண்டார். திமுக அரசு செயல்படுத்தியுள்ள மக்கள் நலத்திட்டங்களையும் சாதனைகளையும் ஒவ்வொரு வீட்டின் கதவு வரை கொண்டு சேர்க்க வேண்டியது தொண்டர்களின் கடமை என்று அவர் வலியுறுத்தினார்.

தேர்தல் களம் சூடுபிடித்துள்ள நிலையில், திமுகவினர் தற்காப்பு ஆட்டம் ஆடாமல் அதிரடியாக “அடித்து ஆட வேண்டும்” என்று அவர் உற்சாகப்படுத்தினார். “முதல் அடி எப்போதும் திமுகவுடையதாக இருக்க வேண்டும்” என்றும், வரும் 2026 சட்டமன்றத் தேர்தலில் கோவையில் திமுக முழுமையான வெற்றியைப் பதிவு செய்யும் என்றும் அவர் தனது உரையில் சுட்டிக்காட்டினார்.