ஜெயலலிதாவே ரிஜெக்ட் பண்ணாங்க… செங்கோட்டையன் முகத்திரை கிழிந்தது… பிரச்சார மேடையில் உண்மையை உடைத்த எடப்பாடியார்…!

ஈரோடு மாவட்டத்தின் பல்வேறு பகுதிகளில் அதிமுக வேட்பாளர்களை ஆதரித்து அக்கட்சியின் பொதுச்செயலாளர் எடப்பாடி பழனிசாமி இன்று தீவிர தேர்தல் பிரச்சாரம் மேற்கொண்டார். அப்போது பேசிய அவர், திமுக ஆட்சியில் தமிழகத்தின் கடன் சுமை 5 லட்சம் கோடியிலிருந்து 10 லட்சம் கோடியாக உயர்ந்துள்ளதாகக் கடுமையாகச் சாடினார். விவசாயிகளின் நலனை முன்னிறுத்திப் பேசிய அவர், அதிமுக மீண்டும் ஆட்சிக்கு வந்தவுடன் கூட்டுறவு வங்கிகளில் பெறப்பட்ட பயிர்க்கடன்கள் தள்ளுபடி செய்யப்படும் என்றும், வண்டல் மண் அள்ளும் திட்டம் மீண்டும் நடைமுறைப்படுத்தப்படும் என்றும் உறுதி அளித்தார். குறிப்பாக, பவானிசாகர் அணைக்கான பாண்டியாறு-புன்னம்புழா திட்டம் மற்றும் அவிநாசி-அத்திக்கடவு திட்டத்தின் விடுபட்ட பகுதிகள் முன்னுரிமை அடிப்படையில் நிறைவேற்றப்படும் என்று அவர் வாக்குறுதி அளித்தார்.

மேலும், கோபிசெட்டிபாளையம் தொகுதியில் போட்டியிடும் செங்கோட்டையன் மீது மறைந்த முதலமைச்சர் ஜெயலலிதா அதிருப்தியில் இருந்ததைச் சுட்டிக்காட்டிய பழனிசாமி, செங்கோட்டையனை விடத் தற்போதைய வேட்பாளர் பிரபு மக்களுக்காக எப்போதும் களத்தில் இருப்பார் என்று குறிப்பிட்டார். தமிழகத்தில் நிலவும் போதைப்பொருள் புழக்கத்திற்கு திமுகவினரே உடந்தையாக இருப்பதாகக் குற்றம் சாட்டிய அவர், அதிமுக ஆட்சிக்கு வந்த மூன்றே மாதங்களில் கஞ்சா உள்ளிட்ட போதைப்பொருட்கள் முற்றிலும் ஒழிக்கப்படும் என உறுதியளித்தார். இவற்றுடன் மலைவாழ் மக்களின் சாதிச் சான்றிதழ் கோரிக்கை நிறைவேற்றப்படும் மற்றும் ஏழை எளிய மக்களுக்கான ‘அம்மா கிளினிக்’ மீண்டும் திறக்கப்படும் என்ற அறிவிப்புகளையும் அவர் தனது உரையில் முன்வைத்தார்.