கதறிய மனைவி, துடிதுடித்த மகன்… போதை தந்தையின் சந்தேகப் பேயால் சீரழிந்த குடும்பம் – நெஞ்சை உலுக்கும் பின்னணி…!

சென்னை வளசரவாக்கம் அருகே உள்ள ராமபுரம் செந்தமிழ் நகரைச் சேர்ந்த 50 வயதுடைய சக்திவேல், பெயிண்டராகப் பணியாற்றி வந்தார். இவரது மனைவி லோகநாயகி மற்றும் கல்லூரி பயிலும் மகன் சதிஷ் (20), மகள் சங்கீதா (18) ஆகியோருடன் வசித்து வந்தார். குடிப்பழக்கத்திற்கு அடிமையான சக்திவேல், தினமும் போதையில் வந்து மனைவியுடன் தகராறு செய்வதை வாடிக்கையாகக் கொண்டிருந்தார். ஒரு கட்டத்தில், மது போதையினால் ஏற்பட்ட மனப்பிறழ்வு காரணமாக, தனது மனைவியின் நடத்தை மீது சந்தேகம் கொண்டு அவர் மீது அவதூறுகளைப் பரப்பத் தொடங்கினார்.

சக்திவேலின் சந்தேகம் எல்லை மீறி, தனது சொந்த மகனுடனேயே மனைவியைத் தொடர்புபடுத்தி உறவினர்களிடம் கூறி வந்துள்ளார். இதனால் அதிர்ச்சியடைந்த உறவினர்கள் அவரை எச்சரித்து புத்திமதி கூறியும், சக்திவேல் தனது போக்கினை மாற்றிக்கொள்ளவில்லை. தொடர்ந்து தனது மனைவியையும் மகனையும் தவறாகக் கருதி, அவர்களுடன் கடும் வாக்குவாதத்தில் ஈடுபட்டு குடும்ப அமைதியைக் குலைத்து வந்துள்ளார். இந்தச் சந்தேகப் பேய் ஒரு கட்டத்தில் ஒரு கொடூரமான கொலைச் சம்பவத்திற்கு வித்திட்டது.

கடந்த 2019-ம் ஆண்டு மார்ச் 11-ம் தேதி இரவு, வழக்கம்போல கணவன் – மனைவி இடையே வாக்குவாதம் வெடித்தது. ஆத்திரத்தின் உச்சத்துக்கே சென்ற சக்திவேல், வீட்டில் ஆழ்ந்த உறக்கத்தில் இருந்த மகன் சதிஷை அரிவாளால் சரமாரியாக வெட்டிக் கொலை செய்தார். இதனைத் தடுக்க முயன்ற மனைவி லோகநாயகி மற்றும் மகள் சங்கீதாவையும் அவர் அரிவாளால் தாக்கி காயப்படுத்தினார். தகவலறிந்து வந்த ராயலா நகர் காவல்துறையினர், சதிஷின் உடலைக் கைப்பற்றி பிரேதப் பரிசோதனைக்கு அனுப்பியதோடு, தலைமறைவாக இருந்த சக்திவேலை உடனடியாகக் கைது செய்து சிறையில் அடைத்தனர்.

இந்தக் கொடூரக் கொலை தொடர்பான வழக்கு கடந்த ஆறு ஆண்டுகளாகப் பூந்தமல்லியில் உள்ள கூடுதல் மாவட்ட அமர்வு நீதிமன்றத்தில் (நீதிமன்றம் 2) நடைபெற்று வந்தது. நேற்று நடைபெற்ற இறுதி விசாரணையின் போது, குற்றம் சாட்டப்பட்ட சக்திவேல் மீதான குற்றச்சாட்டுகள் ஆதாரங்களுடன் நிரூபிக்கப்பட்டன. இதையடுத்து, நீதிபதி புவனேஸ்வரி அவர்கள் சக்திவேலுக்கு ஆயுள் தண்டனை விதித்துத் தீர்ப்பளித்தார். மேலும், 7 ஆயிரம் ரூபாய் அபராதமும், அதனைச் செலுத்தத் தவறினால் கூடுதலாக ஓராண்டு சிறைத் தண்டனையும் அனுபவிக்க வேண்டும் என அதிரடி உத்தரவு பிறப்பித்தார்.