தமிழக சட்டமன்றத் தேர்தல் நெருங்கி வரும் சூழலில், கூட்டணி மற்றும் தொகுதிப் பங்கீடு குறித்து விவாதிக்க டெல்லியில் காங்கிரஸ் கட்சியின் முக்கிய ஆலோசனைக் கூட்டம் நடைபெற்றது. காங்கிரஸ் தலைவர் மல்லிகார்ஜூன கார்கே மற்றும் ராகுல் காந்தி தலைமையில் நடைபெற்ற இக்கூட்டத்தில், தமிழக காங்கிரஸ் கமிட்டித் தலைவர் செல்வப்பெருந்தகை, நாடாளுமன்ற மற்றும் சட்டமன்ற உறுப்பினர்கள் கலந்துகொண்டனர். இந்த ஆலோசனையின் போது, வரவிருக்கும் தேர்தலில் 50 முதல் 60 தொகுதிகள் வரை கோர வேண்டும் என்றும், ஆட்சியில் பங்கு பெற்று அமைச்சரவையில் இடம்பிடிக்க வேண்டும் என்றும் தமிழக நிர்வாகிகள் தங்கள் விருப்பத்தை முன்வைத்தனர்.
கூட்டத்தின் போது திமுக கூட்டணியில் நீடிப்பதா அல்லது தமிழக வெற்றி கழகம் போன்ற மாற்று சக்திகளுடன் இணைவதா என்பது குறித்து சில நிர்வாகிகள் கருத்து தெரிவித்தனர். ஆனால், ராகுல் காந்தி மற்றும் மல்லிகார்ஜூன கார்கே ஆகியோர் இதற்குத் திட்டவட்டமான பதிலை அளித்தனர். கூட்டணி விவகாரங்கள் குறித்து பொதுவெளியிலோ அல்லது சமூக வலைதளங்களிலோ கட்சி நிர்வாகிகள் யாரும் தன்னிச்சையாகக் கருத்து தெரிவிக்கக் கூடாது என்று ராகுல் காந்தி கண்டிப்புடன் அறிவுறுத்தினார். கூட்டணி மற்றும் தொகுதிப் பங்கீடு தொடர்பான இறுதி முடிவுகளைத் தேசியத் தலைமையே எடுக்கும் என்பதால், கட்சியின் கண்ணியத்தைக் காக்கும் வகையில் அனைவரும் பொறுமையைக் கடைப்பிடிக்க வேண்டும் என்று அவர் வலியுறுத்தினார்.
இந்த ஆலோசனைக் கூட்டத்திற்குப் பிறகு செய்தியாளர்களிடம் பேசிய செல்வப்பெருந்தகை, டெல்லி கூட்டம் மிகவும் ஆக்கப்பூர்வமாக அமைந்ததாகத் தெரிவித்தார். திமுக கூட்டணியில் காங்கிரஸ் கட்சி தொடர்வது உறுதி செய்யப்பட்டுள்ளதாகவும், அதிக தொகுதிகளைப் பெறுவது குறித்துத் தலைமை உரிய நேரத்தில் பேச்சுவார்த்தை நடத்தி முடிவெடுக்கும் என்றும் அவர் விளக்கமளித்தார். தலைமையின் முடிவுக்கு அனைவரும் கட்டுப்பட வேண்டும் என்ற நிபந்தனையுடன், உட்கட்சிப் பூசல்கள் இன்றி தேர்தலை எதிர்கொள்ளத் தமிழக காங்கிரஸ் தயாராகி வருவதை இந்தச் சந்திப்பு உறுதிப்படுத்தியுள்ளது.