தமிழக அரசியல் களத்தில் தவெக மற்றும் நாதக ஆகிய இரு கட்சிகளுக்கும் இடையே வார்த்தைப் போர் முற்றியுள்ள நிலையில், “தவெக தலைவர் விஜய் தனித்து விடப்பட்டார், அதனால் தான் அவர் தற்போது தனித்து நிற்கிறார்” என்று நாம் தமிழர் கட்சியின் ஒருங்கிணைப்பாளர் சீமான் தெரிவித்துள்ளார். காரைக்குடியில் மார்ச் 14 அன்று செய்தியாளர்களைச் சந்தித்த அவர், விஜய்யின் அரசியல் நகர்வுகள் குறித்து இந்த விமர்சனத்தை முன்வைத்தார். கூட்டணியின்றி விஜய் களம் காண்பது திட்டமிட்டு எடுக்கப்பட்ட முடிவு என்பதை விட, சூழலால் அவர் தனித்து விடப்பட்டிருப்பதாக சீமான் சுட்டிக்காட்டியுள்ளார்.
சமீபகாலமாக சாட்டை துரைமுருகன் உள்ளிட்ட நாதக நிர்வாகிகள் விஜய்யை கடுமையாக விமர்சித்து வருவது குறித்து செய்தியாளர்கள் கேள்வி எழுப்பினர். அதற்கு பதிலளித்த சீமான், தவெகவினர் முதலில் கண்ணியமாக பேசக் கற்றுக்கொள்ள வேண்டும் என்று ஆவேசமாக குறிப்பிட்டார். தவெக தரப்பினர் தான் தங்கள் கட்சி பிள்ளைகளைப் பற்றித் தொடர்ந்து அவதூறாகப் பேசி வருவதாகவும், அதன் எதிர்விளைவாகவே இங்கிருந்து பதிலடிகள் கொடுக்கப்படுவதாகவும் அவர் விளக்கமளித்தார்.
மேலும், தவெக தொண்டர்களின் செயல்பாடுகள் குறித்து அதிருப்தி வெளியிட்ட சீமான், அவர்கள் தேவையற்ற ‘சேட்டை’களைச் செய்து கொண்டிருப்பதாகச் சாடினார். அரசியலில் நாகரிகம் பேணப்பட வேண்டும் என்பதை வலியுறுத்திய அவர், தங்கள் தரப்பு விமர்சனங்களுக்கு தவெகவினரின் அநாகரிகமான பேச்சுகளே காரணம் என்று குற்றம் சாட்டினார். இந்த மோதல் போக்கு சமூக வலைதளங்களிலும், அரசியல் வட்டாரத்திலும் தற்போது பெரும் விவாதத்தை ஏற்படுத்தியுள்ளது.