ராமநாதபுரம் மாவட்டம் மண்டபம் ஒன்றியத்திற்குட்பட்ட வழுதூர் பகுதியில், தேர்தல் முடிந்து சீல் வைக்கப்பட்ட வாக்குப்பதிவு இயந்திரம் உடைக்கப்பட்டதாக எழுந்துள்ள புகார் அப்பகுதியில் பெரும் பரபரப்பை ஏற்படுத்தியுள்ளது. இது தொடர்பாக வெளியாகியுள்ள வீடியோவில், மற்ற அரசியல் கட்சியினர் யாரும் இல்லாத நேரத்தில், திமுகவினர் முன்னிலையில் மட்டும் வாக்குப்பதிவு இயந்திரத்தை ஏன் திறந்தீர்கள் என பாஜக நிர்வாகிகள் தேர்தல் அதிகாரியிடம் ஆவேசமாகக் கேள்வி எழுப்புகின்றனர். வாக்குப்பதிவு இயந்திரத்தின் பாதுகாப்பு குறித்த இந்த விவகாரம், தேர்தல் நேர்மை மீதான சந்தேகத்தை வலுப்படுத்தியுள்ளது.
இந்தச் சம்பவம் குறித்துத் தேர்தல் அதிகாரி அளித்த விளக்கத்தை ஏற்க மறுத்த பாஜகவினர், அதிகாரிகளுடன் கடும் வாக்குவாதத்தில் ஈடுபட்டதால் அந்த இடத்தில் பதற்றமான சூழல் நிலவியது. சீல் வைக்கப்பட்ட இயந்திரங்கள் பாதுகாப்பாக வைக்கப்பட வேண்டிய நிலையில், இத்தகைய அத்துமீறல்கள் முறைகேடுகளுக்கு வழிவகுக்கும் எனப் எதிர்க்கட்சிகள் குற்றம் சாட்டுகின்றன. இந்த விவகாரம் சமூக வலைதளங்களில் வைரலாகி வருவதைத் தொடர்ந்து, சம்பந்தப்பட்ட அதிகாரிகள் மீது நடவடிக்கை எடுக்க வேண்டும் என்ற கோரிக்கையும் வலுத்து வருகிறது.