தமிழகத்தில் கோடை விடுமுறை முடிந்து கூடுதலாக 3 நாள்கள் தாமதமாக, ஜூன் 4-ம் தேதி பள்ளிகள் திறக்கப்படும் என அரசு அறிவித்துள்ள நிலையில், மாநில தகவல் ஆணையம் பெற்றோர்களுக்குச் சாதகமான ஒரு முக்கிய உத்தரவைப் பிறப்பித்துள்ளது.
அதன்படி, அரசு உதவிபெறும் மற்றும் தனியார் பள்ளிகள் அனைத்தும் தங்களின் கட்டண விவரங்களை, பள்ளியின் அதிகாரப்பூர்வ இணையதளத்திலோ அல்லது பள்ளி வளாகத்தில் உள்ள விளம்பரப் பலகையிலோ பொதுமக்களுக்குத் தெரியும் வகையில் கட்டாயம் வெளியிட வேண்டும் என்று உத்தரவிடப்பட்டுள்ளது. பள்ளிகள் திறக்கப்படுவதற்கு முன்பே கல்விக்கட்டணம் குறித்த துல்லியமான விவரங்களைப் பெற்றோர் எளிதாக அறிந்துகொள்ளவும், கட்டணக் கொள்ளையைத் தடுத்து வெளிப்படைத்தன்மையை உறுதிப்படுத்தவும் இந்த அதிரடி நடவடிக்கை பெரிதும் உதவும் எனப் பாராட்டப்படுகிறது.