“காப்பாத்துங்க.. காப்பாத்துங்க..!” கம்பத்தில் தொங்கியபடி இளைஞர் கதறிய மரண ஓலம்…. நெஞ்சை பதறவைக்கும் வைரல் வீடியோ….!

பெல்லாரி அருகே உள்ள சங்கனகல்லு கிராமத்தில், மின் கம்பத்தில் பழுதுபார்க்கும் பணியில் ஈடுபட்டிருந்த கூலித்தொழிலாளி ஒருவர் மின்சாரத் தாக்குதலுக்கு உள்ளாகி பரிதாபமாக உயிரிழந்த சம்பவம் அப்பகுதி மக்களிடையே பெரும் அதிர்ச்சியையும் சோகத்தையும் ஏற்படுத்தியுள்ளது. உயிரிழந்தவர் ஹுலகப்பா என அடையாளம் காணப்பட்டுள்ளார். இவர் மின் கம்பத்தில் ஏறி வேலை செய்து கொண்டிருந்தபோது, திடீரென உயர் அழுத்த மின்சாரம் பாய்ந்ததில் தூக்கி வீசப்படாமல் கம்பத்திலேயே தொங்கியுள்ளார். “காப்பாற்றுங்கள், காப்பாற்றுங்கள்” என்று அவர் உயிருக்குப் போராடியபடி மரண ஓலமிட்டதை அக்கம் பக்கத்தினர் அதிர்ச்சியுடனும் பீதியுடனும் வேடிக்கை பார்க்க மட்டுமே முடிந்தது.

முதற்கட்ட விசாரணையின்படி, தினக்கூலி அடிப்படையில் இப்பணியில் அமர்த்தப்பட்ட ஹுலகப்பா, முறையான பாதுகாப்பு உபகரணங்கள் ஏதுமின்றி மின் கம்பத்தில் ஏறியதாகத் தெரிகிறது. மேலும், பழுதுபார்க்கும் பணி தொடங்குவதற்கு முன்பாக மின் விநியோகம் முழுமையாக நிறுத்தப்படவில்லை என்றும், இந்த அலட்சியமே அவரது மரணத்திற்கு வழிவகுத்தது என்றும் கூறப்படுகிறது. இக்கோர விபத்து சமூக வலைதளங்களில் வீடியோவாக வெளியாகி வைரலாகி வருவதோடு, பார்ப்போரின் நெஞ்சைக் பதறவைப்பதாக உள்ளது.

https://twitter.com/HateDetectors/status/2075207089685774448/video/1

இந்தத் துயரச் சம்பவம் உள்ளூர் மக்களிடையே கடும் கொந்தளிப்பை ஏற்படுத்தியுள்ளது. மின்சாரப் பராமரிப்புப் பணிகளின் போது பின்பற்றப்படும் பாதுகாப்பு வழிமுறைகள் குறித்து அவர்கள் கேள்வி எழுப்பியுள்ளனர். குல்பர்கா மின்சார விநியோக நிறுவன (GESCOM) அதிகாரிகள் மற்றும் உள்ளூர் லைன்மேனின் அலட்சியமே இந்த விபத்திற்குக் காரணம் என்று குற்றம் சாட்டும் பொதுமக்கள், இதற்குப் பொறுப்பானவர்கள் மீது உரிய நடவடிக்கை எடுக்க வேண்டும் என வலியுறுத்துகின்றனர். ஹுலகப்பாவின் குடும்பத்தினரின் கதறல் ஒட்டுமொத்த கிராமத்தையும் சோகத்தில் ஆழ்த்தியுள்ள நிலையில், அதிகாரிகள் இச்சம்பவம் குறித்து தீவிர விசாரணை நடத்தி வருகின்றனர்.