ஈரான் மற்றும் இஸ்ரேல் இடையிலான மோதல் போர் மேகங்களாக உருவெடுத்துள்ள நிலையில், அண்டை நாடான பாகிஸ்தான் முன்னெப்போதும் இல்லாத ஒரு ராஜதந்திரச் சிக்கலில் சிக்கியுள்ளது. கடந்த செப்டம்பர் மாதம் சவுதி அரேபியாவுடன் பாகிஸ்தான் மேற்கொண்ட ‘மூலோபாய பரஸ்பர பாதுகாப்பு ஒப்பந்தம்’ (SMDA) இதற்குக் முக்கிய காரணமாகும். இந்த ஒப்பந்தத்தின்படி, சவுதி அரேபியாவின் பாதுகாப்புக்கு அச்சுறுத்தல் ஏற்பட்டால், அதைத் தன் மீதான தாக்குதலாகக் கருதி பாகிஸ்தான் ராணுவ ரீதியாக உதவ வேண்டும். சவுதியின் நிதி மற்றும் எண்ணெய் இறக்குமதியை முழுமையாக நம்பியிருக்கும் பாகிஸ்தானுக்கு, இந்த ஒப்பந்தம் தற்போது ஒரு ‘தர்மசங்கடமான’ சுமையாக மாறியுள்ளது.
ஈரானுக்கு எதிரான போரில் சவுதிக்கு ஆதரவாகக் களமிறங்குவது பாகிஸ்தானின் உள்நாட்டு அமைதிக்கு மிகப்பெரிய அச்சுறுத்தலாகும். பாகிஸ்தானில் கணிசமான அளவில் வாழும் ஷியா முஸ்லிம் மக்களிடையே இது கடும் கொந்தளிப்பை ஏற்படுத்தி, உள்நாட்டு மோதல்களுக்கு வழிவகுக்கும் என்று அஞ்சப்படுகிறது. ஏற்கனவே பொருளாதாரச் சரிவிலும், அரசியல் ஸ்திரத்தன்மையற்ற சூழலிலும் தத்தளிக்கும் பாகிஸ்தானுக்கு, அண்டை நாடான ஈரானுடன் பகைத்துக் கொள்வது என்பது எரியும் நெருப்பில் எண்ணெய் ஊற்றுவது போன்ற விபரீத முடிவாக அமையும்.
தற்போதைய நிலையில், பாகிஸ்தான் அரசு தூதரக ரீதியான பேச்சுவார்த்தைகள் மூலம் தீர்வு காணப்பட வேண்டும் என்று நடுநிலை வகித்து வருகிறது. இருப்பினும், போர் தீவிரமடைந்து சவுதி அரேபியா அதிகாரப்பூர்வமாக ராணுவ உதவியைக் கோரினால், பாதுகாப்பு ஒப்பந்தத்தை மதிப்பதற்கும் நாட்டின் உள்நாட்டு நலனைப் பாதுகாப்பதற்கும் இடையே பாகிஸ்தான் ஒரு கடினமான போர்க்கயிற்றுப் போட்டியை எதிர்கொள்ள வேண்டியிருக்கும்