தமிழ் சினிமாவில் வில்லனின் அடியாட்களில் ஒருவராக தோன்றி பின்னர் வில்லனாக உருவானவர் சத்யராஜ். தன்னைப் பற்றி பேசும் போது ‘வில்லன் கூட்டத்தில் ஒருவனாக இருந்து ‘எஸ் பாஸ்’ சொல்லியே நான் 100 படங்களுக்கு மேல் நடித்துள்ளேன் எனக் கூறியுள்ளார். அதன் பிறகு பாரதிராஜா மற்றும் மணிவண்ணன் ஆகியோர் இயக்கத்தில் அவர் நடித்த படங்கள் அவரை கதாநாயகனாக்கின.
தமிழ் சினிமாவில் தற்போது வரை சிறந்த நடிகராகவும் வில்லனாகவும் கலக்குபவர் நடிகர் சத்யராஜ். ஹீரோவாக நடித்த போது தமிழில் மட்டுமே நடித்து வந்த சத்யராஜ், இப்போது பிறமொழிப் படங்களிலும் நடித்து வருகிறார். சத்யராஜுக்கு ஒரு மகனும் ஒரு மகளும் உள்ளனர். மகன் சிபிராஜ் திரைப்படங்களில் நடித்து வருகிறார். ஆனால் இப்போதும் தன் மகனை விட பிஸியான நடிகராக இருந்து வருகிறார் சத்யராஜ்.
2005 வரை ஹீரோவாக நடித்து வந்த சத்யராஜுக்கு அப்போது மார்க்கெட் சரிய ஆரம்பித்தது. அதனால் அவர் மீண்டும் குணச்சித்திர வேடங்களில் நடிக்கும் முடிவை எடுத்தார். அந்த முடிவு அவரை இன்று வரை பிஸியான நடிகராக வைத்துள்ளது. தென்னிந்திய மொழிகளில் மட்டும் இல்லாமல் தற்போது இந்தி படங்கள் வரை நடித்துக் கலக்கிக் கொண்டிருக்கிறார்.
இந்நிலையில் சமீபத்தில் அவர் அளித்த செவ்வி ஒன்றில் தான் வாங்கிய சம்பளம் ஒன்று தனக்கு அளித்த அதிர்ச்சி பற்றி பேசியுள்ளார். அதில் “நான் ஜப்பானில் கல்யாணராமன் படத்துக்காக ஷூட்டிங் அழைத்தபோது சம்பளமே பேசவில்லை. ஜப்பானுக்கு அழைத்து செல்கிறார்கள் சம்பளமே இல்லை என்றாலும் பரவாயில்லை என்று சென்றுவிட்டேன். ஷூட்டிங் முடிந்து திரும்பி வந்ததும் பஞ்சு அருணாசலம் சார் ஒரு கவரில் செக் போட்டுக் கொடுத்தார்.
அதைப் பிரித்தால் அதில் ஒரு லட்சம் ரூபாய்க்கான கவர் இருந்தது. நான் அப்போது 15 ஆயிரம், 25 ஆயிரம் என்றுதான் சம்பளம் வாங்குவேன். நான் அதிர்ச்சியாகி பஞ்சு அண்ணனுக்கு போன் செய்து ‘வேறு யாருக்காவது கொடுக்கவேண்டிய செக்கை எனக்குக் கொடுத்து விட்டீர்களா’ எனக் கேட்டேன். அவர் இல்லை என்றதும் சந்தோஷம் தாங்க முடியவில்லை.” எனப் பேசியுள்ளார்.