தமிழக சட்டமன்றத் தேர்தல் முடிவுகள் 50 ஆண்டுகால திராவிட ஆட்சிகளுக்கு முற்றுப்புள்ளி வைத்து, தமிழக வெற்றிக் கழகத்தின் எழுச்சியை உறுதி செய்துள்ள நிலையில், நடிகர் சத்யராஜ் வெளியிட்டுள்ள வீடியோ வைரலாகி வருகிறது. 2026 தேர்தலில் அமோக வெற்றி பெற்றுள்ள விஜய் மற்றும் தவெக எம்.எல்.ஏ-க்களுக்குத் தனது மனமார்ந்த வாழ்த்துகளை அவர் தெரிவித்துள்ளார். குறிப்பாக, தந்தை பெரியார் மற்றும் அண்ணல் அம்பேத்கர் ஆகியோரைத் தனது கொள்கைத் தலைவர்களாக விஜய் ஏற்றுக்கொண்டதைச் சுட்டிக்காட்டிய சத்யராஜ், அவர்கள் காட்டிய வழியில் நின்று ஒரு சிறப்பான சமூக நீதி ஆட்சியை விஜய் வழங்க வேண்டும் எனத் தனது விருப்பத்தை வெளிப்படுத்தியுள்ளார்.
அதேசமயம், திமுக தலைவர் மு.க. ஸ்டாலினின் தோல்வி குறித்துப் பேசிய சத்யராஜ், இது தனக்கு மிகுந்த மனவேதனை அளிப்பதாகக் குறிப்பிட்டுள்ளார். கொளத்தூர் தொகுதியில் ஸ்டாலின் தோல்வியடைந்தாலும், அவர் இத்தகைய சரிவுகளைக் கண்டு ஒருபோதும் துவண்டு விடமாட்டாரென நம்பிக்கை தெரிவித்துள்ளார். கடந்த ஐந்தாண்டுகளில் ‘திராவிட மாடல்’ ஆட்சியைச் சிறப்பாக வழிநடத்தி, டெல்லிக்கு அஞ்சாமல் பல வளர்ச்சித் திட்டங்களைக் கொண்டுவந்து தமிழ்நாட்டை இந்திய ஒன்றியத்தின் முதன்மை மாநிலமாக மாற்றியதற்காக ஸ்டாலினுக்குத் தனது நன்றியையும் அவர் சமர்ப்பித்துள்ளார்.
திராவிட மாடல் அரசின் கொள்கை நிலைப்பாடுகளுக்காகத் தான் எப்போதும் உறுதுணையாக இருந்ததை நினைவுகூர்ந்த சத்யராஜ், ஸ்டாலினுக்குத் தனது ஆதரவு எப்போதும் தொடரும் என்பதை உறுதிபடக் கூறியுள்ளார். தேர்தல் முடிவுகளால் ஆட்சி மாற்றம் ஏற்பட்டிருந்தாலும், வரும் காலங்களில் முத்துவேல் கருணாநிதி ஸ்டாலினுக்கும் திராவிட முன்னேற்றக் கழகத்திற்கும் தனது ஆதரவு இன்னும் வலுவாகவும், மன உறுதியோடும் இருக்கும் எனத் தெரிவித்துள்ளார். வெற்றி பெற்றவர்களுக்கு வாழ்த்துகளையும், தோல்வியடைந்த தனது தலைவருக்குத் தார்மீக ஆதரவையும் சரிசமமாகப் பகிர்ந்துள்ள சத்யராஜின் இந்த உரை அரசியல் வட்டாரத்தில் கவனத்தை ஈர்த்துள்ளது.