தனது 17 ஆண்டுகால அகில இந்திய சமத்துவ மக்கள் கட்சியைப் பாஜகவுடன் இணைத்து இரண்டு ஆண்டுகள் நிறைவடைந்துள்ள நிலையில், நடிகர் சரத்குமார் தற்போது கடும் அதிருப்தியில் இருப்பதாகத் தெரிகிறது. கட்சி இணைப்பின் போது டெல்லி அளவில் பெரிய பொறுப்புகள் கிடைக்கும் என எதிர்பார்க்கப்பட்ட நிலையில், வெறும் ‘தேசிய செயற்குழு உறுப்பினர்’ என்ற கௌரவப் பதவி மட்டுமே அவருக்கு வழங்கப்பட்டுள்ளது. மேலும், தமிழக பாஜகவின் முக்கிய முடிவுகளிலோ அல்லது தேர்தல் வியூகக் கூட்டங்களிலோ அவருக்கு உரிய முக்கியத்துவம் அளிக்கப்படுவதில்லை என்ற குமுறல் அவரது ஆதரவாளர்களிடையே எழுந்துள்ளது.
இந்தச் சூழலில், தனது அடுத்தகட்ட அரசியல் நகர்வு குறித்து ஆலோசிக்க நாளை தனது ஆதரவாளர்களுடன் சரத்குமார் முக்கியக் கூட்டம் ஒன்றை நடத்த உள்ளார். இக்கூட்டத்தில் பாஜக தலைமைக்குக் கெடு விதிப்பது அல்லது மீண்டும் தனது பழைய கட்சியை மீட்டெடுத்துத் தனித்துப் போட்டியிடுவது போன்ற அதிரடி முடிவுகளை அவர் எடுக்க வாய்ப்புள்ளது. குறிப்பாக, நடிகர் விஜய்யின் ‘தமிழக வெற்றி கழகம்’ போன்ற புதிய சக்திகளுடன் அவர் கைகோர்க்கும் பட்சத்தில், அது தென் மாவட்டங்களில் உள்ள நாடார் சமூக வாக்கு வங்கியில் பெரிய மாற்றத்தை ஏற்படுத்தி, 2026 சட்டமன்றத் தேர்தலில் புதிய திருப்புமுனையை உண்டாக்கலாம் என எதிர்பார்க்கப்படுகிறது.