தமிழ்நாட்டில் இடைநிலை ஆசிரியர்கள் “சம வேலைக்குச் சம ஊதியம்” உள்ளிட்ட கோரிக்கைகளை வலியுறுத்தித் தொடர்ந்து போராட்டத்தில் ஈடுபட்டு வருவதால், மாணவர்களின் கல்வி நலன் கடுமையாகப் பாதிக்கப்படுவதாகப் பள்ளிக் கல்வித்துறை கவலை தெரிவித்துள்ளது. பள்ளிகள் விடுமுறைக்குப் பின் மீண்டும் திறக்கப்பட்டுள்ள நிலையில், இந்தப் போராட்டத்தால் மாணவர்களுக்கான நலத்திட்ட உதவிகள் விநியோகம் மற்றும் அன்றாடக் கற்பித்தல் பணிகள் முடங்கியுள்ளதாகத் துறை சார்பில் குற்றம்சாட்டப்பட்டுள்ளது.
கல்விப் பணிகள் பாதிக்கப்படுவதைத் தவிர்க்கும் பொருட்டு, போராட்டத்தில் ஈடுபட்டுள்ள ஆசிரியர்களுக்கு “பணி இல்லை, ஊதியம் இல்லை” என்ற கொள்கையின் அடிப்படையில் சம்பளம் பிடித்தம் செய்யப் பள்ளிக் கல்வித்துறை அதிரடியாக உத்தரவிட்டுள்ளது. இதற்கிடையில், அரசு அதிகாரிகளுடன் நடைபெற்ற பேச்சுவார்த்தைகளில் முழுமையான தீர்வு எட்டப்படாததால், கோரிக்கைகள் நிறைவேறும் வரை போராட்டத்தைத் தொடரப் போவதாக ஆசிரியர்கள் சங்கம் அறிவித்துள்ளது.