சமீபகாலமாக ரஜினிகாந்த் நடிக்கும் படங்களுக்கு பெரும்பாலும் அனிருத் தான் இசையமைத்து வருகிறார். ஜெயிலர் 2 படத்துக்கு பின் ரஜினிகாந்த் நடிக்கும் புதிய படத்தை ராஜ்கமல் பிலிம்ஸ் நிறுவனம் சார்பில் நடிகர் கமல்ஹாசன்தான் அந்த படத்தை சொந்தமாக தயாரிக்கிறார். இந்த படத்தின் இயக்குனர் சுந்தர் சி என முதலில் அறிவிக்கப்பட்ட நிலையில், திடீரென அவர் பின்வாங்கி விட்டார். தவிர்க்க முடியாத சில காரணங்களில் இந்த படத்தை இயக்க முடியவில்லை என்றும் சுந்தர் சி அறிக்கை வெளியிட்டது குறிப்பிடத்தக்கது.
இதைத் தொடர்ந்து இந்த படத்தை பார்க்கிங் பட இயக்குனர் ராம்குமார் பாலகிருஷ்ணன் இயக்குவது ஏறக்குறைய முடிவாகி விட்டது. நடிகர் சிம்பு நடிக்க இருந்த படத்தின் கதையை ரஜினிக்கு ஏற்ப மாற்றி இந்த படத்தை அவர் டைரக்ட் செய்கிறார். கதை கேட்ட ரஜினியும் ஓகே சொல்லிவிட்டார். ஆனால் இந்த படத்துக்கு அனிருத் இசையமைக்கவில்லை. மாறாக, தனது முதல் படமான பார்க்கிங் படத்துக்கு இசையமைத்த சாம் சிஎஸ் தான் இயக்குனர் ராம்குமார் பாலகிருஷ்ணனின் விருப்பமாக இருந்தது. ஆனால் படத்தின் தயாரிப்பாளர் கமல்ஹாசன், இசையமைப்பளாராக சாய் அபயங்கரை தேர்வு செய்திருப்பதாக தகவல் வெளியாகி உள்ளது. விரைவில் இதுபற்றிய அதிகாரபூர்வ அறிவிப்பு வெளியாக உள்ளது.