இந்தியாவின் வான்வெளிப் பாதுகாப்பை மேலும் வலுப்படுத்தும் வகையில், ரஷ்யாவிடமிருந்து 4-வது ‘எஸ்-400’ (S-400) அதிநவீன ஏவுகணைப் பாதுகாப்புப் படைப்பிரிவை (Squadron) இந்திய விமானப்படை வெற்றிகரமாகப் பெற்றுள்ளது. கடந்த சில நாட்களுக்கு முன்பு கடல் வழியாக இந்தியா வந்தடைந்த இந்த ஏவுகணை அமைப்பு, நாட்டின் முக்கிய எல்லைப் பகுதியில் விரைவில் நிலைநிறுத்தப்பட உள்ளது. ரஷ்யா-உக்ரைன் போர் காரணமாக விநியோகத்தில் ஏற்பட்ட தாமதத்திற்குப் பிறகு, இந்தத் தற்போதைய வரவு இந்தியப் பாதுகாப்புத் துறைக்கு ஒரு முக்கிய மைல்கல்லாகப் பார்க்கப்படுகிறது.
இந்தியா மற்றும் ரஷ்யா இடையே கடந்த 2018-ஆம் ஆண்டில், சுமார் 5.43 பில்லியன் அமெரிக்க டாலர் மதிப்பில் ஐந்து எஸ்-400 ஏவுகணை அமைப்புகளை வாங்குவதற்கான ஒப்பந்தம் கையெழுத்தானது. இதில் முதல் மூன்று ஏவுகணைப் பிரிவுகள் ஏற்கனவே இந்தியாவிற்கு வழங்கப்பட்டு, அவை வான் பாதுகாப்புப் பணியில் இணைக்கப்பட்டுள்ளன. தற்போது வந்துள்ள 4-வது பிரிவைத் தொடர்ந்து, ஒப்பந்தத்தின் இறுதி மற்றும் 5-வது ஏவுகணைப் பிரிவு வரும் நவம்பர் மாதத்திற்குள் இந்தியாவிடம் ஒப்படைக்கப்படும் என்று எதிர்பார்க்கப்படுகிறது.
ரஷ்யாவின் இந்த எஸ்-400 ஏவுகணை அமைப்பு, உலகிலேயே மிக அதிநவீன நீண்ட தூர வான் பாதுகாப்பு அமைப்புகளில் ஒன்றாகக் கருதப்படுகிறது. இது சுமார் 600 கி.மீ தொலைவில் வரும் எதிரி நாட்டுப் விமானங்கள், ஏவுகணைகள் மற்றும் ட்ரோன்களைக் கண்டறிந்து, 400 கி.மீ தூரத்திலேயே அவற்றை துல்லியமாகத் தாக்கி அழிக்கும் திறன் கொண்டது. அண்மையில் நடைபெற்ற ‘ஆபரேஷன் சிந்துர்’ (Operation Sindoor) ராணுவ நடவடிக்கையின் போது இந்த எஸ்-400 அமைப்பு மிகச் சிறப்பாகச் செயல்பட்டு எதிரிகளின் வான்வழி அச்சுறுத்தல்களை முறியடித்ததால், மேலும் 5 கூடுதல் எஸ்-400 பிரிவுகளை வாங்குவதற்கும் இந்தியப் பாதுகாப்பு அமைச்சகம் ஒப்புதல் அளித்துள்ளது குறிப்பிடத்தக்கது.